"Usafi wa Hospitali uendelee kuuenzi Muungano"- DC Mkanachi

Tarehe iliyowekwa: April 14th, 2024

Mkuu wa Wilaya ya Kondoa Dkt. Khamis Mkanachi amewataka viongozi wa Hospitali ya Mji Kondoa kwa kuendelea na usafi wa hospitali hiyo kama ulivyofanyika wakati wa maadhimisho ya kuelekea siku ya kilele cha miaka 60 ya Muungano wa Jamhuri ya Muungano wa Tanzania.

Ameyasema hayo wakati akionge na viongozi, watumishi na wananchi waliojitokeza kufanya usafi katika Hospitali ya Mji Kondoa ikiwa ni sehemu ya maadhimisho ya kuelekea kilele cha miaka 60 ya Muungano wa Jamhuri ya Muungano wa Tanzania.

“Tukija mwezi ujao tusikute nyasi kama kitalu cha TFS hapana ibaki mandhari nzuri yenye hewa nzuri na bustani nzuri mpaka mgonjwa aone raha kuja hospitali sasa usafi huu uendelee”

Aidha amewaambia kuwa siku ya Jumatatu kutakuwa na dua maalum kwa ajili ya kuliombea taifa itakayofanyika katika viwanja vya Jamhuri Dodoma hivyo anawataka viongozi wote na wananchi kujitokeza ambapo usafiri umeandaliwa kwa watakaotaka kwenda ikiwemo viongozi wa dini.

“Kaulimbinu inasema miaka 60 ya Jamhuri ya Muungano wa Tanzania “Tumeimarika na kushikamana kwa maendeleo ya taifa letu” kwa hiyo tuendelee kuonyesha mshikamano kuonyesha kweli tumeimarika kwa kwenda pamoja na kurudi pamoja tuendelee kuungana mkono”amesisitiza Dkt. Mkanachi

Aidha ameendelea kuwa tarehe 25/04/2024 kutakuwa na michezo mbalimbali katika uwanja wa Sabasaba kuanzia asubuhi na usiku watapata fursa ya kumsikiliza Rais wa Jamhuri ya Muungano wa Tanzania Mhe. Dkt. Samia Suluhu Hassan kupitia runinga kubwa itakayokuwepo uwanjani hapo ambapo atalihutubia taifa na sherehe zitamalizika saa 6 usiku.

Akiongea awali Mwenyekiti wa CCM Hayati Hadija Suru amewataka wanafunzi kusoma historia ili wajue maana ya Muungano ambao uliasisiwa na Rais wa Tanganyika Hayati Mwalimu Julius Nyerere na Rais wa Zanzibar Hayati Abeid Karume ambao walifanya nchi hii kuwa moja yaani Tanzania.

“Mnaweza kujiuliza kwanini tumeungana yote haya watangulizi wetu walipima mambo mengi sana, usalama wa nchi yetu ni muhimu sana kuliko kitu chochote kikubwa ni amani kwani akija adui akaipiga Zanzibar hatuwezi kuwa salama lakini hadi sasa amani imetawala na CCM tutauunga muungano kwa kila hali,”amesema Mwenyekiti Suru.

Viongozi mbalimbali wamekutana kwa ajili ya kufanya usafi Hospitali ya Mji Kondoa kwa kuongozwa na Mheshimiwa Mkuu wa Wilaya ya Kondoa Dkt. Khamis Mkanachi wakuu wa taasisi, waheshimiwa madiwani, wakuu wa idara, watumishi na wananchi ikiwa ni sehemu ya kuelekea kilele cha maadhimisho ya Muungano wa Tanzania ambapo kaulimbiu inasema miaka 60 ya Jamhuri ya Muungano wa Tanzania “Tumeimarika na kushikamana kwa maendeleo ya taifa letu”