Ushirikiano Kupunguza Ukatili wa Kijinsia Kondoa Mji

Tarehe iliyowekwa: April 1st, 2019

Jamii imeshauriwa kushirikiana kwa umoja wao ili kupunguza tatizo la ukatili wa kijinsia katika jamii ya wananchi wa Kondoa.

Ushauri huo umetolewa na Mkurugenzi wa Halmashauri ya Mji Kondoa Msoleni Dakawa alipokuwa akifungua semina ya kupinga ukatili wa kijinsia iliyofanyika katika ukumbi wa Chuo Cha Uuguzi Kondoa hivi karibuni.

Alisema kuwa watoto wamekuwa wakifanyiwa ukatili wa kiwango cha juu na kesi nyingi haziendi mbele sababu nyingi humalizwa kifamilia jambo ambalo si sawa kwani mtoto  anakuwa ameshaharibiwa.

“Mtoto akishazoeshwa michezo ya ukatili wa kingono tunazalisha kizazi cha mashoga na ukifuatilia chanzo cha tatizo ni shuleni hivyo tusipounganisha nguvu zetu pamoja kizazi chetu kwa asilimia kubwa kitakuwa cha mashoga ni jukumu letu kuhakikisha hili linadhibitiwa mapema kabla ya kuleta athari kubwa kwa jamii.”Alisema Dakawa

Aliongeza kuwa ukatili wa kingono huathiri jamii kwa kiasi kikubwa kwani wengi waliojiingiza katika masuala ya ushoga hushindwa kuzalisha na kujiingizia kipato ili kujikwamua kiuchumi na ndio maana serikali inapinga suala hili la ushoga kwa nguvu zote.

Hata hivyo alisema kuwa ukatili wa kijinsia huanzia kwa asilimia kubwa katika malezi kwani kuna watoto ambao hufanyiwa ukatili wanashindwa kuwashirikisha wazazi kutokana na ukali wa wazazi hivyo kupelekea tatizo kuwa kubwa na kumuathiri mtoto.

“Lazima tuweke utaratibu wa kutoa elimu ya makuzi ya vijana na ndio maana shuleni tumeweka walimu wanaoshughulikia matatizo ya watoto wa kike na kiume na kutenga sehemu maalum kwa ajili ya watoto wa kike kujistiri na yote yanafanyika ili kupambana na ukatili wa kijinsia nchini.”Alisisitiza Dakawa

Kwa upande wake Mratibu wa Ukimwi Idara ya Afya Revocatus Shigi aliwataka washiriki kuanza kuonyesha mabadiliko wao kwanza ili kuiokoa jamii nzima kutokana na mafunzo na mbinu watakazozipata za jinsi ya kuwasaidia wahanga wa matukio ya ukatili wa kijinsia.

Semina ya ukatili wa kijinsia imefanyika kwa kuwashirikisha wadau mbalimbali ikiwemo wataalamu wa Idara ya Afya, Polisi, Watendaji wa Kata na Mitaa, Walimu, mahakama, na wataalamu kutoka Idara ya Maendeleo ya Jamii