Vijana Kondoa Mji watakiwa kuchangamkia fursa kujiinua kiuchumi

Tarehe iliyowekwa: February 21st, 2023

Vijana katika Halmashauri ya Mji Kondoa wametakiwa kuchangamkia fursa mbalimbali za kuwaingizia kipato zinazopatikana katika Halmashauri ya Mji ili waweze kujiinua kiuchumi na kuondokana na utegemezi.

Ushauri huo umetolewa na Mbunge wa Jimbo la Kondoa Mjini Mhe. Juma Makoa akiwa mgeni rasmi katika kongamano la kutangaza fursa mbalimbali kwa wajasiriamali wa Halmashauri ya Mji Kondoa lililoandaliwa na Divisheni ya Maendeleo ya Jamii na kufanyika katika ukumbi wa Kondoa Irangi hivi karibuni.

“Fursa Kondoa zimeonekana ni nyingi mno na kwasasa tumefunguka kiutalii zaidi ya watalii 5000 wanakuja kwenye kituo cha michoro mapangoni kwa mwaka lakini hakuna mtu hata mmoja anayejishughulisha Kolo wengi ni wageni kutoka maeneo mengine tuamke kama meneja alivyoelezea , tumefungua Mkungunero na inafikika, bonde la Swagaswaga serikali imejenga miundombinu fursa nyingi zipo ila bahati mbaya jinsi ya kuzifikia ndio hatujui,”amesema Mhe. Makoa

Aidha ameongeza kuwa serikali imeleta miradi katika kila kata ikiwemo ujenzi wa Zahanati, Vituo vya Afya na madarasa lakini vibarua na mafundi wanaotumika katika kazi hizo ni kutoka nje ya Halmashauri ya Mji jambo ambalo si sahihi kwa kuwa lengo la serikali pia ni kupunguza umaskini kwa wananchi wa eneo husika.

“Kulikuwa na vijana walichukuliwa kwa ajili ya kazi ya kuchimba mitaro ya maji walikimbia na hawajui kazi za Serikali zina muda maalum na zinatakiwa zikamilike kwa muda huo Mkanadarasi kweli achukue watu kutoka Songea na vijana wetu wapo hapa tuambiane tu ukweli vijana wetu ni wavivu hawataki kuchangamkia fursa,”amesisitiza Mhe. Makoa.

Aidha amewapongeza wanawake wengi waliojitokeza katika kongamano hilo na kusikitishwa na vijana na wanaume kubaki nyuma kushiriki kwenye makongamano kama hayo ambayo yanawafungulia fursa mbalimbali ambazo zitawaongezea kipato na kuwainua kiuchumi na hivyo amewataka wazazi kuendelea kuzungumza na vijana kwa kuwaambia ukweli kuwa waache uvivu.

Akitoa mada wakati wa kongamano hilo Meneja wa kituo cha Michoro ya Mapangoni Kolo Ndg. Zuberi Mabie amewashauri wananchi wa Kolo na Halmashauri ya Mji kwa ujumla kutumia fursa za utalii zilizopo katika kituo hicho ambazo kwasasa zinafanywa na watu kutoka sehemu nyingine.

“Fursa zilizopo Kolo kituoni pale ni nyingi ambazo ni malazi kwa wageni, ngoma za asili, kuongoza wageni kwenye mapango yenye michoro, usafirishaji wa watalii, kuanzisha maduka ya zawadi kwa wageni, kufuma na kushona vikoi, kuanzisha kampuni za kitalii na utoaji wa huduma za kifedha kwa kuwa wageni wengi wanakuja na kadi za benki za nje,”amesema Meneja Zuberi

Akitoa ushuhuda kwa niaba ya wanufaika wa mikopo ya asilimia 10 katika Halmashauri ya Mji Kondoa Bi. Hawa Hassan ameishukuru serikali kwa kuwapatia mikopo kwa kuwa imebadilisha kwa kiasi kikubwa maisha yao na wameondokana na hali ya utegemezi kama ilivyokuwa awali.

Mfunzo ya kuwajengea uwezo wajasiriamali na kuwapatia fursa zinzopatikana katika taasis mbalimbali kimefanyika ambapo wataalam kutoka TARURA, Ardhi, Michoro ya Mapangoni na Kilimo walitoa mada za kuonyesha fursa mbalimbali katika taasis hizo na kilihudhuriwa pia na baadhi ya Waheshimiwa Madiwani wa Halmashauri ya Mji Kondoa.