Vijiji 2 vilivyovamia hifadhi kufutwa 40 kusalia Dodoma

Tarehe iliyowekwa: October 6th, 2021

Vijiji viwili kati ya vijiji 42 ambavyo vipo katika maeneo ya hifadhi katika mkoa wa Dodoma kufutwa ambapo kati ya hivyo 40 vinavyosalia, vijiji 20 vitabakia na mipaka yake kama ilivyo na vijiji 20 vilivyosalia timu ya wataalam italetwa kufanya tathmini na kujua mipaka itakapowekwa.

Hayo yamesemwa na Waziri wa Ardhi Mhe. William Lukuvi wakati wa ziara ya Mawaziri nane wanaopita katika maeneo ya migogoro kati ya wananchi na hifadhi katika mkutano na wananchi wa Kijiji cha Bereko Wilaya ya Kondoa hivi karibuni.

“Vijiji viwili vilivyopo katika Wilaya ya Chemba hivyo vitaondoka na wananchi wameishalipwa fidia ili kupisha ujenzi wa bwawa la Farukwa  ambalo litalisha maji katika Jiji la Dodoma na baadhi ya vijiji katika Wilaya ya Chemba na Kondoa,”amesema Mhe. Lukuvi.

Aidha amesema marekebisho yatakayofanywa katika vijiji 20 vitakavyofanyiwa tathmini na wataalam yatakuwa shirikishi ili kuwapimia ardhi inayofanana na mahitaji ya vijiji husika na kuweka alama za mipaka zinazoonekana na yote hayo yametokana na huruma ya Rais Mhe.  Samia Suluhu Hassan kwa mkoa wa Dodoma na ana imani baada ya zoezi hilo kukamilika wananchi hawatavamia tena maeneo yaliyovamiwa.

“Serikali imeamua kuja kufanya tathmini upya ya pori la Mkungunero kwasababu limekuwa na taarifa zinazojichanganya kidogo hivyo tutakuja kuweka mipaka upya na ufanya tathmini upya ili maeneo yote yanayohifadhiwa wananchi wajue na tutafanya shirikishi kwa kushikiana na viongozi wa kuanzia wilaya, mkoa na wananchi wanaozunguka pori hili linaanzia wapi na kuishia wapi na tutaweka mipaka inayoonekana,”amesisitiza Mhe. Lukuvi

Aidha ameahidi kulifanyia kazi suala la familia ya Mzee Gadia ambayo ina mgogoro na Wakala wa Uhifadhi wa Misitu katika sehemu ya ekari nne kati ya kumi ya shamba lao  lililopo katika hifadhi kwa kutuma timu ya wataalam kufanya tathmini ya eneo hilo ambapo awali familia hiyo ilishinda kesi mahakamani na TFS wakakata rufaa.

 Akiongea katika mkutano huo mbunge wa Kondoa Mhe. Dkt. Ashatu Kijaji amempongeza Mhe. Lukuvi kwa kazi iliyofanyika ambapo kwa Bereko tatizo ni mlima wa Salanka ambao wamekaa nao toka zamani na matatizo yameanza miaka ya karibuni shida kubwa ikiwa ni kukosekana kwa mipaka inayotabirika.

“Ukilima mbaazi mwaka huu zikakubali mpaka unasogezwa, ng’ombe wetu asikatishe tunapigwa faini ambayo hatujawahi kuiona tunahiyo changamoto kubwa kwetu kwa hiyo Mhe.Waziri wa Ardhi tukuombe nafahamu kwenye taarifa umeambiwa kuna nyumba mbili tu siyo tatizo la nyumba mbili ni tatizo la kata sita mipaka haieleweki,”amesema Mhe. Dkt. Ashatu.

Aliendelea kwa kumuomba Waziri wa Maji Mhe. Juma Aweso kuwasaidia wananchi wa Kondoa kupata maji kwani yaliyopo hayatoshi kwani baadhi ya kata hakuna maji kabisa hivyo bilioni mbili zitakazotolewa na serikali wahakikishe wananchi wa Kondoa wanapata maji.

Ziara ya Waheshimiwa Mawaziri imefanyika katika mkoa wa Dodoma ambapo imehitimishwa katika Wilaya ya Kondoa mawaziri saba, Manaibu na Makatibu Wakuu walishiriki kutoka Wizara ya Ardhi, Maji, Mifugo, Maliasili, OR-TAMISEMI, Mazingira ambapo Ofisi ya Mkuu wa Mkoa iliongozwa na Mkuu wa Mkoa Mhe. Anthon Mtaka na Katibu Tawala Mkoa Dkt. Fatuma Mganga na Wilaya iliwakilishwa na Mkuu wa Wilaya ya Kondoa Mhe. Khamis Mkanachi na Wakuu wa Idara wa Halmashauri za Wilaya ya Kondoa.