Vikundi vilivyohitimu mikopo asilimia 10 vyaunganishwa na Taasisi za fedha

Tarehe iliyowekwa: April 6th, 2021

Vikundi vilivyonufaika na mikopo itokanayo na asilimia 10 ya mapato ya Halmashauri wameshauriwa kujiunga na kuanzisha kampuni na viwanda vidogo ili kupata mikopo mikubwa na kujiimarisha kiuchumi.

Ushauri huo umetolewa na Mkurugenzi wa Halmashauri ya Mji Kondoa Msoleni Dakawa wakati wa kikao cha kuwapongeza vikundi vilivyowahi kunufaika na mikopo na kukuza mitaji yao kilichofanyika katika ukumbi wa mikutano katika ofisi za Halmashauri hivi karibuni.

" Mmehitimu nawapongeza sana na nyie mnapaswa mkawe mfano na walezi wa vikundi vilivyoanza kupewa mikopo ili fedha walizopata wasije kupeleka kwenye sherehe ikiwa lengo lake ni kuwekeza ili wakue kiuchumi na kuendeleza familia na inawezekana sababu fedha hizi wanarudisha bila riba,"amesema Mkurugenzi Dakawa

Aidha ameongeza kuwa kwasasa wao wamekuwa kimtaji na mapato yameongezeka hivyo ni wakati wao kulipia leseni ya biashara ambayo wanaweza kuitumia kupata mikopo benki itakayowawezesha kukuza mitaji yao na si kitambulisho cha ujasiriamali kama awali ambacho kitabaki kwa ajili ya wajasiriamali wadogo.

"Fedha mlizokuwa nazo baada ya kumaliza mkopo zitumieni kwenye uwekezaji ikibidi fungueni kampuni au viwanda vidogo ambapo mtaajiri watu wengine nasi kama Halmashauri tutawaongezea mtaji hata milioni 20 kuliko fedha mlizokuwa mnazipata awali kama kikundi,"amesisitiza Mkurugenzi Dakawa

Wakiongea katika kikao hicho Mwenyekiti wa Halmashauri Mhe. Mohamed Kiberenge na Makamu Mwenyekiti Mhe. Besela Maunga wamewapongeza wanufaika hao kwa kufikia hatua hiyo na kuwashauri kuwatumia wataalam wa Halmashauri katika miradi wanayotarajia kuwekeza na biashara wanazotarajia kufungua ili wasijekuwekeza fedha kwenye biashara zisizo na tija.

Mmoja wa wanufaika wa mikopo hiyo Bi. Hawa Chora ameishukuru Halmashauri kwa kuwawezesha fedha na mafunzo mbalimbali kutoka katika mashirika yasiyo ya kiserikali ambayo yamewasaidia kusimamia vizuri miradi yao na kukua kiuchumi.

"Sisi kikundi chetu awali kilianza na ufugaji wa nyuki, tukaingia kwenye kilimo cha alizeti ambapo kwasasa tumejiingiza pia katika kazi ya kutengeneza majiko na maisha yetu kwa kiwango kikubwa yamebadilika nawashauri wataopata na waliopata mikopo hivi karibuni walipe marejesho kwa wakati ili wengine nao wanufaike,"amesisitiza Bi. Hawa

Awali akisoma taarifa Mkuu wa Idara ya Maendeleo ya Jamii Bi. Irene Mosha amesema jumla ya vikundi 25 vimefanikiwa kurejesha mikopo yao vizuri na kukuza mitaji yao ambapo wanatarajia kuongeza mitaji zaidi kwa kukopa benki.

"Nawashukuru sana viongozi mmekuwa bega kwa bega sana katika upatikanaji wa fedha hizi na vikundi hivi vimeshakopa zaidi ya mara mbili na kurejesha fedha zote kwa wakati lakini pia hali ya marejesho kwasasa kwa vikundi  vingine inaendelea vizuri,"amesisitiza Bi. Irene

Halmashauri ya Mji kondoa imefanya kikao cha pamoja na wanufaika hao ikiwa ni pamoja na viongozi wa vikundi vilivyopata mkopo katika robo ya pili kwa mwaka 2020/2021 pamoja na wawakilishi wa Benki za CRDB, NMB na TPB waliotoa elimu ya manufaa na fursa ya mikopo ya benki.