Viongozi watakiwa kuhamasisha wazazi wenye watoto wenye mahitaji maalum

Tarehe iliyowekwa: February 1st, 2024

Viongozi wa CCM na Serikali wametakiwa kushirikiana kufanya hamasa kwenye mikutano ya wazazi ili wawapeleke shule watoto wenye mahitaji maalumu na wapate elimu kama watoto wengine.

Hayo yamesemwa na Katibu wa CCM Mkoa wa Dodoma Ndg. Pili Mbaga wakati  wa ziara  iliyofanywa na kamati ya siasa mkoa kukagua mradi wa ujenzi wa mabweni ya watoto wenye mahitaji maalum hivi karibuni.

“Tusiwakatie tamaa watoto wenye mahitaji maalum kwani wanaweza kuja kuwa watu wakubwa kwahiyo niwaombe viongozi wa chama na serikali muendelee kutoa hamasa katika mikutano mnayofanya kwa kukaa na wazazi wenye watoto wa mahitaji maalumu kuwapeleka mashuleni,”amesema Katibu

Ameongeza kwa kumpongeza mwalimu ambaye anawasimamia na kuwafundisha watoto hao wenye mahitaji maalum shuleni hapo kwa kazi kubwa anayoifanya kwa kuwapandisha watoto watatu wenye ulemavu wa akili kwa kufanya vizuri na kupandishwa madarasa.

‘’Wapo wenye ulemavu wa akili wameanza kufanya vizuri kwahiyo nimpongeze mwalimu pamoja na walimu wote kwa kazi nzuri ambayo mnafanya pia  mtafute mwalimu wa kike ambaye atasaidiana na mwalimu wa kiume kuwasimamia watoto wa kike kwani huyu mwalimu tunamtwisha majukumu ya familiya kwa kuwahudumia watoto wa kike na wa kiume,”amesisitiza Katibu

Aidha ameendelea kwa kumuomba Kaimu Mkurugenzi kufanya mchakato wa kutafuta walimu ambao wataweza kuwafundisha watoto wenye mahitaji maalumu katika shule hiyo na msimamizi ambaye atawasimamia katika usafi mabwenini ili kutunza mazingira shuleni hapo.

Ameongeza kwa kumpongeza Rais wa Jamhuri ya Muungano wa Tanzania Dkt. Samia Suluhu Hassan kwa kuwaletea mradi wa mabweni na Mamlaka ya Elimu Tanzania    kwa kuwaongezea mabweni ya kiume pia wasimamizi kwa usimamizi mzuri wa majengo  na kuwataka yaishe kwa wakati ili watoto waweze kusoma.

Akiongea kwa upande wake Makamu Mwenyekiti wa Halmashauri ya Mji Kondoa Mhe. Zainabu Haroub amemshukuru Katibu kwa ujio wake na kutembelea miradi kwani kwa kufanya hivyo kunawasaidia wao kama wasimamizi kupata moyo wa kuendelea kusimamia na kuahidi miradi yote kukamilika kwa wakati na kutoa huduma iliyokusudiwa.

Akisoma taarifa ya mradi Mwalimu Mkuu wa Shule ya Msingi Iboni Mwalimu amesema shule imepokea fedha shilingi milioni 128 kutoka Serikali Kuu kwaajili ya ujenzi wa bweni la watoto wenye mahitaji maalum ambapo lina uwezo wa kuchukua watoto 80 kwa wakati mmoja ambapo pia kupitia Mamlaka ya Elimu Tanzania wamepata kiasi cha shilingi milioni 142 kwa ajili ya ujenzi wa bweni la watoto wenye mahitaji maalum ambalo litakuwa na uwezo wa kubeba watoto 120 kwa wakati mmoja.

Katibu wa CCM Mkoa wa Dodoma Ndg. Pili Mbanga amefanya ziara ya kukagua miradi katika Halmashauri ya Mji Kondoa ambapo alipata fursa ya kutembelea mradi wa ukarabati wa shule ya Msingi Kondoa wenye thami ya shilingi milioni 180 na mradi wa ujenzi wa mabweni ya wanafunzi wenye mahitaji maalum Shule ya Msingi Iboni wenye thamani ya shilingi milioni 128.