Viwanja 14,000 kupimwa Kondoa Mji

Tarehe iliyowekwa: April 16th, 2024

Viwanja 14,000 vya wananchi wa  Halmashauri ya Mji Kondoa vinatarajiwa kupimwa na kupewa hati baada ya Benki ya Dunia kutoa fedha kupitia Wizara ya ardhi kwa ajili ya utekelezaji wa mradi wa uboreshaji usalama wa milki za ardhi lengo likiwa ni kuhakikisha mji wote unapangwa kwa kipindi cha miezi sita.

Hayo yamesemwa na kiongozi wa wataalam kutoka Wizara ya Ardhi Ndg. Paul Kitosi wakati wa kutambulisha mradi huo mbele ya wajumbe wa kamati ya Mipango Miji na Mazingira hivi karibuni.

"Kondoa Mji mna bahati sana kwani mradi huu unatekelezwa katika halmashauri 41 tu za mjini na halmashauri 60 za vijijini na utatekelezwa katika kata 7 za Kondoa Mji na hiyo moja iliyobakia tutaona uwezekano wa kisheria tuweze kuimalizia ili zoezi lifanyike katika kata zote 8 na zoezi likikamilika halmashauri isiwe na makazi holela,"amesema Paul

Aidha amesema serikali itapima na kugawa hati kwa wananchi na haitachukua hata kiwanja kimoja kutoka kwa wananchi zoezi kwani utekelezaji wa zoezi hili ni sehemu ya utekelezaji wa Ilani ya CCM ya 2020-2025 ukurasa wa 119 hadi 121 ambapo Wizara ya ardhi imepangiwa  kusajili hati mjini milioni 2.5.

Kwa upande wake Ndg.Awadhi Salum  amesema mbali na kupimiwa viwanja pia Halmashauri itanufaika na kujengewa ofisi ya ardhi ya wilaya na kufungwa mifumo ya kisasa ambayo ambayo itasaidia kuondoa changamoto ya kupima eneo moja mara 2 na kupunguza muda wa kufuatilia hati.

Naye Mwenyekiti wa Kamati ya Mipango Miji na Mazingira Mhe. Issa Kambi amewakaribisha wataalam hao kwa kusema kuwa utekelezaji wa mradi huo utasaidia kuyapanga maeneo na kutatua changamoto ya ufuatiliaji wa hati kwa kipindi kirefu.

Kwa upande wake Mkurugenzi wa Halmashauri ya Mji Kondoa Ngd. Said Majaliwa ameishukuru serikali kuleta mradi huo na kuwataka wananchi kutumia fusra hiyo kupimiwa maeneo yao na kumilikishwa kisheria.

Mradi wa uboreshaji usalama wa milki za ardhi utatekelezwa katika halmashauri 41za mijini na 60 za wilaya ambapo jumla ya hati miliki milioni 1.5 na leseni za makazi laki 5 zitatolewa kwa kipindi cha miaka mitano ambapo pia watafanya uhamasishaji katika ngazi zote kabla ya kuanza utekelezaji.