"Vyeti vya kuzaliwa ni bure msijinufaishe" - DC Mkanachi

Tarehe iliyowekwa: June 28th, 2021

Mkuu wa Wilaya ya Kondoa  Mhe. Khamis Mkanachi amewataka wasajili wasaidizi katika zoezi la utoaji wa vyeti vya kuzaliwa kwa watoto chini ya miaka mitano kutowatoza fedha zozote wananchi kwa kuwa zoezi hilo linafanyika bure.

Kauli hiyo ameitoa wakati wa ufunguzi wa mafunzo ya usajili wa vyeti vya kuzaliwa kwa kwaajili wasaidizi yaliyofanyika katika ukumbi wa Chuo cha Uuguzi Kondoa.

"Vyeti hivi vinatolewa bure lakini kuna fedha za serikali zimetolewa kufanikisha zoezi na fedha hizo zinatokana na kodi zetu sote tunazotoa serikalini lakini lengo kuu ni kuhakikisha huduma hiyo ya Msingi inapatikana kwa watoto wote nawasihi mkalifanye kwa ufanisi na umakini mkubwa,"amesema Mhe. Mkanachi

Aidha amewataka wasajili hao kuvitunza vitendea kazi walivyopewa ikiwemo simu za mkononi kwa kuwa wana taarifa wengine hutumia simu hizo kwa manufaa yao na kuweka vitu visivyotakiwa jambo ambalo ni kinyume na malengo na watakaokaidi hatua stahiki zitachukuliwa dhidi yao.

"Tusiende kuishia katika kusajili tu ila tuhakikishe tuna upload taarifa hizi ili ziende mahali husika kwani vyeti hivi vinatumika pia katika kupata takwimu za watoto zitakazowezesha serikali kupanga mipango ya baadae hivyo mkienda kinyume mjue mmewakosesha haki za msingi watoto," amesisitiza Mhe. Mkanachi

Ameendelea kueleza faida za mtoto kuwa na chetu cha kuzaliwa ni pamoja na kutumika wakati wa usajili shule za Msingi na vyuo, kumsaidia wakati wa umiliki wa ardhi ikiwa ni pamoja na kuthibisha uraia wa mtoto husika na kuwasihi kusikiliza kwa umakini wawezeshaji kwa kuwa ana imani watawaelekeza namna ya kutambua wahusika.

Akiongea awali Mkurugenzi wa Halmashauri ya Mji Kondoa Msoleni Dakawa amewasihi washiriki kujitoa katika kukamilisha zoezi hilo na kuhakikisha watoto wote walio chini ya miaka mitano wanasajiliwa na kupatiwa vyeti.

Naye mwakilishi wa RITA Mohamed Hassan amesema lengo la mafunzo ni kusogea kwa ukaribu huduma ya vyeti vya kuzaliwa ambapo awali wananchi walisafiri umbali mrefu kufuata huduma hiyo katika ofisi za Katibu Tawala Wilaya ambapo kwa sasa watapata huduma hiyo kwenye maeneo yao.

Zoezi la utoaji wa vyeti vya kuzaliwa limeanza litaanza rasmi tarehe 29 Juni na kumalizika tarehe 3 Julai 2021 ambapo huduma hii itatolewa katika ofisi za kata, Zahanati, Vituo vya afya na hospitali na Halmashauri ya Mji Kondoa ilijiwekea lengo la kusajili watoto elfu tisa na hadi sasa wanasajili watoto elfu Saba na kubakia na watoto elfu mbili kukamilisha lengo.