Wadau wa huduma ndogo za kifedha Kondoa Mji wapatiwa mafunzo

Tarehe iliyowekwa: May 26th, 2023

Wadau wa huduma ndogo za kifedha katika Halmashauri ya Mji Kondoa wamepatiwa mafunzo ya kuwajengea uwezo kuhusu masuala ya kifedha na mikopo ili watoe huduma bora na wakopaji kupata huduma bora isiyomuumiza.

Mafunzo hayo yamefunguliwa na Mwenyekiti wa Halmashauri ya Mji Kondoa Mhe. Mohamed Kiberenge kwa niaba ya Mkuu wa Wilaya ya Kondoa Mhe. Khamis Mkanachi na yamefanyika katika Ukumbi wa mikutano wa Halmashauri ya Mji Kondoa hivi karibuni.

Akiongea Mhe.Kiberenge amewataka washiriki wa mkutano huo kuwa makini mitaani na watu wanaowafuata ili wawapatie mikopo kwa kuwachangisha fedha kwani hakuna utaratibu kama huo nchini.

"Kuna watu wanatumia vibaya majina ya viongozi mtoe taarifa katika ngazi za uongozi katika maeneo yenu hasa kwa Watendaji na Wenyeviti ili watu hao wachukuliwe hatua za kisheria, zipendeni hela zenu msizitoe hovyo,"amesisitiza Mhe. Kiberenge

Aidha amewataka washiriki kutokuwa wasiri wanapokutana na changamoto kwa waliowakopesha ili kuepuka kujidhuru na kuzisihi taasis zinazotoa huduma ndogo za kifedha kushiriki katika shughuli za kijamii ili kuunga mkono juhudi zinazofanywa na Serikali ya awamu ya sita katika utekelezaji wa miradi.

Nao wawezeshaji kutoka Wizara ya Fedha wamewasihi wananchi kuwa waangalifu na wakopeshaji wanaowafuata ambapo wamewataka kuhakikisha kabla ya kuchukua mikopo wakopeshaji hao wawe wanatambulika kisheria na serikali.

Kwa upande wake Mkuu wa Divisheni ya Maendeleo ya Jamii Bi. Irene Mosha amewataka wamiliki wa taasisi za huduma ndogo za kifedha kuwapatia elimu wakopaji wao kabla ya kuwapatia elimu na kuboresha ofisi zao ili ziendane na huduma wanazozitoa.

"Nawasihi sana nyie wamiliki mzingatie usafi wa mazingira katika maeneo yenu, ulipaji wa service levy, kuwakopesha watu wenye mahitaji maalum na upandaji wa miti," amesisitiza Bi. Irene

Mafunzo kwa wadau wa huduma ndogo za kifedha yamefanyika ambapo yamehudhuriwa na Kamati ya Usalama Wilaya, Waheshimiwa Madiwani, watoa huduma ndogo za kifedha, wanavicoba na wawakilishi kutoka Wizara ya Fedha.