Waendesha 'bodaboda' Kondoa Mji kurasimishwa

Tarehe iliyowekwa: October 7th, 2019

Ofisi ya mbunge kwa kushirikiana na Ofisi ya Mkuu wa Wilaya na Ofisi ya Mkurugenzi wanatarajia kuwarasimisha waendesha pikipiki ndani ya Halmashauri ya Mji Kondoa ili kazi hiyo itambulike na kuthaminiwa kama kazi zingine.

Hayo yalisemwa na mbunge wa Kondoa Mjini Mhe. Edwin Sannda alipokuwa kwenye mkutano wa hadhara kwa ajili ya kusikiliza kero za waendesha pikipiki uliofanyika katika viwanja vya Stendi ya Zamani Kondoa Mjini hivi karibuni.

“Tunataka kuwasaidia mtambulike ili mpate mafunzo kwa kusirikiana na  wadau wengine ambayo yatawasaidia kupata vyeti na mwisho leseni ambapo hadi sasa wengi wenu hawana ikiwa ni pamoja na kutoa elimu ya usalama barabarani ili kuepusha ajali zinazotokea kwasasa,”alisema Mhe. Sannda

Aliendelea kueleza kuwa watawasaidia pia kuwaandalia mikataba itakayokuwa na faida kati ya mmiliki na dereva wa pikipiki na kuepusha hali ya kumnyonya mmojawapo kwa kuwa hiyo nayo ni kazi kama kazi zingine ikiwa ni pamoja na kuwaandalia katiba ya umoja wao.

“Msikubali kuonewa katika kazi yenu mtumishi akipanda pikipiki yako na hajakulipa toa taarifa katika vyombo husika ikishindikana mlete katika ofisi yangu mjiamini katika kazi yenu asiwepo wa kuwaonea,”alisisitiza Mhe. Sannda akijibu swali la mmoja wa wananchi.

Kwa upande wake Afisa Usalama barabarani Inspekta Haule aliwataka waendesha pikipiki kuzingatia kanuni na taratibu za usalama barabarani ili kuepukana na kupigwa faini za mara kwa mara na kwa usalama wa maisha yao.

“Niwaombe sana wazazi tukae na vijana wetu na kuwafundisha maadili na hatutasita kumchukulia hatua za kisheria mtu yote anayekiuka sheria za barabarani tunataka watu wote tuwe salama hivyo tutii sheria bila shuruti,”alisisitiza Inspekta Haule

Zoezi la urasimishaji pikipiki utaanza kwa kata tatu za Kondoa Mjini, Chemchem na Kilimani ambapo viongozi wa mpito wa waendesha pikipiki alipewa fomu za kuorodhesha pikipiki za kila kijiwe kwa muda wa wiki moja kabla ya kuanza kwa zoezi la kuwarasimisha.