"Wafanyabiashara Kondoa jisajilini kanzi data ya EWURA kunufaika na bomba la mafuta"- DC Mkanachi

Tarehe iliyowekwa: February 15th, 2024

Wafanyabiashara wa Wilaya ya Kondoa wametakiwa kujisajili kwenye kanzidata ya EWURA ili kuweza kupata fursa mbalimbali za kutoa huduma katika kambi ya wafanyakazi wa bomba la mafuta iliyo mbioni kuanza.

Kauli hiyo imetolewa na Mkuu wa Wilaya ya Kondoa Dkt. Khamis Mkanachi wakati wa kikao cha baraza la biashara wilaya ya Kondoa lililofanyika katika ukumbi wa mikutano wa Kondoa Irangi hivi karibuni.

“Awali tulifanya kikao na wafanyabiashara kuwaeleza masuala ya kujisajili katika kanzi data ya EWURA ili wapate fursa za kutoa huduma katika kambi ya bomba la mafuta na muda ukatolewa lakini hadi leo hakuna mfanyabiashara kutoka Kondoa aliyejisajili mi siamini kama hakuna watu wenye uwezo wa kutoa huduma hata ya ulinzi si kweli,”amesema Dkt. Mkanachi

Aidha ameongezea kwa kusema kuwa huduma inayopaswa kutolewa ni ya kiwango cha kimataifa ambapo kuna wataalam abao watakuwa wanapima ubora wa bidhaa na iwapo zimekidhi viwango na kipaumbele kitakuwa kwanza kwa wananchi waliopo karibu na eneo la bomba ambapo kwa Kondoa Mjini ni kata ya Serya.

“Wakazi wa Serya wakishindwa kutoa huduma watafuatiwa wananchi wa Kondoa Mjini wakishindwa ndipo watapewa watu wan je ya Kondoa hivyo tuchangamkie fursa ikiwemo kujisajili kwenye kazi data na atakayepata kama atakuwa wa nje ya Kondoa tutamshawishi anunue kwa wakati wa Kondoa,”amesisitiza Dkt. Mkanachi.

Ameongeza kwa kuwaagiza Maafisa Kilimo na Mifugo wa Halmashauri za Kondoa kwenda kuongea na wakulima wa mbogamboga na wafugaji kuongeza uzalishaji kwani soko litakuwa kubwa kwani mayai, kuku, maziwa na mbogamboga vitahitajika kwa kiasi kikubwa.

Kwa upande wake Mwenyekiti wa Halmashauri ya Mji Kondoa Mhe. Mohamed Kiberenge amewakumbusha wananchi wa Kondoa kubadilika na kutumia fursa hiyo ili waweze kusonga mbele kiuchumi na kutumia fursa adhimu iliyoletwa na serikali katika wilaya ya Kondoa.

“Twendeni tukazungumze na wananchi na kujipanga ili kujua tunahitaji kwenda wapi na nakuomba Mkuu wa Wilaya utusaidie katika kuhakikisha tunawabadilisha fikra watu wa Kondoa na kupata fursa zitakazotolewa na uwepo wa bomba la mafuta,”amesema Mhe. Kiberenge

Baraza la biashara limefanyika na limehudhuriwa na wafanyabiashara mbalimbali kutoka Wilaya ya Kondoa ambapo changamoto mbalimbali zimejadiliwa na kupata ufumbuzi hapohapo na zilizohitaji maamuzi zaidi zimepelekwa kwenye mamlaka husika ikiwemo kupunguza ushuru wa hoteli.