Wafanyabiashara Kondoa watakiwa kutumia fursa kukua kiuchumi

Tarehe iliyowekwa: September 3rd, 2022

Mkuu wa Wilaya ya Kondoa Dkt. Khamis Mkanachi amewataka wafanyabiashara wa Wilaya ya Kondoa kutumia fursa mbalimbali zilizopo wilayani humo kwa kuwa mazingira yameboreshwa hali ambayo itawafanya hao wakue kimtaji na kuwa wafanyabiashara wakubwa.

 amefanya kikao na wafanyabiashara wa Wilayani Kondoa kwa ajili ya kujadili masuala mbalimbali yanayowahusu ikiwa ni pamoja na kuwapa elimu ya masuala ya kodi.

Kauli hiyo ameitoa wakati wa kikao  na wafanyabiashara, wataalam wa Mamlaka ya Mapato Tanzania na Halmashauri  wilayani humo kilichofanyika katika ukumbi wa mikutano wa Kondoa Irangi hivi karibuni.

“Bomba la mafuta linakuja tumieni fursa hiyo kwa kuungana pamoja na kufanya vitu kwa pamoja ili muweze kutoa huduma mbalimbali kwa wafanyakazi wa bomba la mafuta ikiwa ni pamoja na kununua gari la kubebea maji taka ambalo hakuna kwasasa mtapata kipato na pia wananchi watahitaji huduma yenu,”amesema Dkt. Mkanachi

Aidha amewasihi kuendelea kuwekeza katika sekta ya utalii kwa kuwa kwa sasa mazingira yameboreshwa katika hifadhi ya Mkungunero ambapo inapokea wageni wanaokuja kwa ajili ya kutalii na wanahitaji sehemu za kupumzika hivyo ni wakati wao kujenga hoteli za kisasa zitakazowavutia na wao kujipatia fedha na kukua kichumi.

Aidha amewataka Mamlaka ya Mapato Tanzania kuacha kuwasumbua wafanyabiashara ili wafanye biashara zao kwa utulivu na kutumia lugha nzuri pindi wanapoenda kukusanya kodi ikiwa ni pamoja na kuwatoza tozo wanazostahiki kulipa.

“TRA najua mna utaratibu wenu wa kutoa elimu hivyo mjipange vizuri na wakati mnakusanya mapato inategemea mnaendaje suala la kutoa fedha si rahisi linahitaji ushawishi sasa kama hauna lugha nzuri ya ushawishi nitakupa hela?Hapana siwezi kutoa fedha hebu twende vizuri tuwashirikishe ili watupe kodi tunazozihitaji,”amesisitiza Dkt. Mkanachi.

Hata hivyo amewataka wawatoze kodi zinazoendana na biashara zao kwani kwa kuwatoza zaidi hawatapata kodi kwa kuwa mfanyabiashara hawatakuwa na fedha zaidi ya wanavyozalisha kwani akiweza leo kwa kesho hataweza hivyo ni jukumu lao kumkuza mfanyabiashara ili baadae waweze kupata kodi zinazotakiwa.

Ameendelea kuwasihi vijana wafanyabiashara kutumia fursa ya mikopo inayotolewa na Halmashauri kujiendeleza kiuchumi kwa kuwa mikopo hiyo haina riba na kuziagiza Halmashauri kuwakutanisha vijana na kuwasaidia kuandika maandiko ya biashara ili wawe na biashara endelevu za zitakazowakuza na kuwa wafanyabiashara wakubwa.

Naye Mkurugenzi wa Halmashauri ya Mji Kondoa Ndg. Paul Sweya amewataka vijana chini ya miaka 35 kujiunga katika vikundi na kuomba mikopo kutoka Halmashauri ambayo inatolewa kila robo mwaka na kuwasisitiza kuwa kwasasa mikopo inatolewa kwa njia ya mtandao na elimu ya jinsi ya kuomba inaendelea kutolewa.

Akitoa elimu ya mlipa kodi Afisa Usimamizi Kodi kutoka Mamlaka ya Mapato Tanzania Ndg. Philipo Eliamini amesema kodi wanayopaswa kulipa inatokana na faida ya mauzo kwa mwaka na kila mfanyabiashara analipa kulingana na biashara yake na ndio maana kuna wafanyabiashara wakubwa, kati na wadogo.

“Mfanyabiashara ambaye mauzo yake ni chini ya shilingi milioni nne hawajibiki kulipa kodi TRA anachukuliwa kama mjasiriamali mdogo, mauzo ya milioni nne hadi saba kodi yake ni milioni moja, milioni saba hadi 11 kodi milioni mbili na nusu, milioni kumi na mbili hadi milioni 99 atalipa  asilimia 3.5 ya mauzo yake,”amesema Ndg.Philipo

Kwa upande wao wafanyabiashara wameushukuru uongozi kwa kikao hicho cha kuwakutanisha pamoja ambapo pia wamepata fursa ya kuelezea changamoto zao na wameomba kiwe kinafanyika mara kwa mara na wamefahamu mambo mbalimbali kuhusu ulipaji kodi na umuhimu wake hivyo wataenda kuwa mabalozi kwa wengine katika kulipa kodi.

Kikao cha Mkuu wa Wilaya na wafanyabiashara kimefanyika kwa lengo la kuwakutanisha lakini pia kuwapatia elimu ya mlipa kodi ambapo pia kilihudhuriwa na kamati ya Ulinzi na Usalama, Mwenyekiti wa Halmashauri, Mkurugenzi wa Halmashauri ya Mji, Wakuu wa Idara na baadhi ya Wenyeviti wa Mitaa.