Wafungwa 44 wanufaika na msamaha wa Rais Wilaya ya Kondoa

Tarehe iliyowekwa: December 10th, 2019

Zaidi ya wafungwa 40 wa gereza la Wilaya ya Kondoa wamenufaika na msamaha uliotolewa na Rais Dkt. John Pombe Magufuli wakati wa maadhimisho ya siku ya Uhuru yaliyofanyika Mkoani Mwanza.

Mkuu wa Wilaya ya Kondoa Mhe. Sezaria Makota amesoma tamko la kuwatoa wafungwa hao alipotembelea gereza hilo mnamo tarehe 10.12.2019.

Akiongea na wafungwa walioachiwa Mkuu wa Wilaya alisema kuwa msamaha huo umetolewa kutokana na upendo na huruma ya Rais Dkt. John Magufuli kwa wananchi wake na kuwasihi kutotumia vibaya fursa hiyo ya msamaha waliyoipata.

“Msamaha wa mwaka huu ni wa kihistoria kwani haijawahi kutokea idadi kubwa kama hii ya wafungwa kupata msamaha mkawe watu wema katika jamii na sitegemei kuwaona tena gerezani,” alisema Mhe. Makota.

Aidha aliwasihi kwenda kufanya shughuli za kilimo kwani msimu huu ni wa mvua na kuutumia ujuzi mbalimbali walioupata wakiwa gerezani kwa aili ya uzalisha mali na kujipatia kipato halali ili wajiinue kiuchumi.

Hata hivyo aliwasihi wafungwa walioachiliwa kwenda kuwa na nidhamu kwani Kamati ya Ulinzi na Usalama itawafuatilia kujua mwenendo wao katika  maeneo yao.

“Wafungwa watakaosamehewa leo ni wafungwa waliobakiza siku 0hadi miezi 6, wafungwa waliobakiza  miezi 7 hadi 12 na wafungwa watakaotoka ni wale ambao majina yao yapo kwenye orodha ya majina yaliyoletwa kutoka makao makuu tu,”alisisitiza Mhe. Makota.

Naye mmoja wa wafungwa walioachiliwa Hussein Juma mkazi wa Mtaa  wa Iyoli aliwashukuru viongozi wote kwa kupata msamaha wa Rais na kuahidi kwenda kuwa mtu mwema na kuleta maendeleo.

Msamaha wa wafungwa umetolewa na Rais Dkt. John Magufuli katika maadhimisho ya siku ya Uhuru ambapo wafungwa 5533 walipata msamaha bila kujali aina ya kosa walilofanya.