Wahe.Madiwani Waaswa kusimamia nidhamu

Tarehe iliyowekwa: August 1st, 2021

Mwenyekiti wa Halmashauri ya Mji Kondoa Mhe. Mohamed Kiberenge amewaasa waheshimiwa madiwani kuendelea kusimamia  nidhamu katika kutekeleza shughuli za kuwaletea wananchi maendeleo.

Kauli hiyo ameitoa wakati wa mkutano wa baraza la waheshimiwa madiwani kwa ajili ya kujadili taarifa za robo ya nne kwa mwaka wa fedha 2020/2021 uliofanyika katika ukumbi wa Halmashauri hivi karibuni.

"Bila nidhamu hakuna maendeleo na ndio maana nawaomba muendelee kusimamia suala la nidhamu katika maeneo yenu ya kazi kila mtu akitimiza wajibu wake katika hili hakika tutafanikiwa"amesisitza Mhe. Mwenyekiti.

Ameendelea kuishukuru kamati ya ulinzi na usalama kwa kuhakikisha kuwa Kondoa Mji inakuwa shwari na watu wake wanaishi kwa amani bila hofu wakati wanatekeleza shughuli zao za kimaendeleo.

"Kuna mambo mengi yanaendelea lakini hamchoki mnafanya muwezalo kuhakikisha kuwa Halmashauri yetu inakuwa salama na mnasimamia ipasavyo nidhamu ya vijana wetu ambao ni nguvu kazi ya Mji wetu na taifa kwa ujumla,"ameongeza Mhe.Mwenyekiti.

Akiongea Mkuu wa Wilaya ya Kondoa Dkt. Khamis Mkanachi  amewashukuru wote walioshiriki katika mwenge wa uhuru na kuwaomba kuendelea kushirikiana na kujitoa katika masuala mengine kwa maslahi ya Kondoa nzima.

"Nimefarijika kuona umoja wenu jinsi mnavyojitoa katika mambo makubwa kama haya niwaombe tu muendelee kushikamana na kusaidiana katika mambo yote yenye manufaa kwa nchi yetu" amesisitiza Dkt. Mkanachi.

Mkutano wa baraza la waheshimiwa madiwani kwa ajili ya kujadili taarifa za robo ya nne kwa mwaka wa fedha 2020/2021 umefanyika na kuhudhuriwa na Mkuu Wilaya, Kamati ya ulinzi na usalama, Wakuu wa Idara na vitengo, waandishi wa habari pamoja na wananchi.