Wajasiriamali watakiwa kushirikiana na taasisi za fedha kukuza mitaji

Tarehe iliyowekwa: April 4th, 2025

Kaimu Mkurugenzi wa Halmashauri ya Mji Kondoa Ndg. Hassan Kiseto amewasisitiza wawekezaji na wajasiriamali kushirikiana na taasisi zingine za kifedha kama benki ili waweze kupata fursa za mikopo na hatimaye kuwa wawekezaji wakubwa na wawekezaji wa kati.

Wito huo umetolewa katika semina ya kuhamasisha uwekezaji Kondoa Mji ambayo imeandaliwa na kituo Cha Uwekazaji Tanzania (T.I.C) kwa kushirikiana na Chemba ya Biashara, Viwanda na Kilimo Tanzania  (TCCIA), pamoja na Idara ya biashara  iliyopo katika ofisi za Halmashauri ya Mji Kondoa.

"Ni matarajio yangu kuwa kupitia semina hii tutapata elimu ya kutosha kupitia kwa wenzetu wa mabenki kuona fursa zilizopo kwenye sera na mfumo wa mikopo"amesema Kiseto

Akiongea na wajasiriamali waliohudhuria semina hiyo Afisa Uwekezaji kutoka TIC Ndg. Athuman Mkayandika amesema kuwa wao humtambua muekezaji kutokana na thamani ya mradi husika ambapo alisema kuwa muekezaji wa kawaida mtanzania anatakiwa kuwa na wazo la mradi wenye thamani ya shilingi milioni 120 ambapo ndani ya miaka mitano awe na uwezo wa kutumia fedha hizo katika mradi.

Hata hivyo ameongeza  kuwa endapo wawekezaji watajisajiri na TIC watapata faida kadhaa ikiwemo misamaha ya baadhi ya kodi pindi muekezaji anapoingiza bidhaa kutoka nje.

Semina hiyo ya siku moja imefanyika katika ukumbi wa mikutano wa Halmashauri ya Mji Kondoa ambapo zaidi ya wawekezaji na wajasiriamali 15 wamehudhuria.