WAKANDARASI WAPONGEZWA

Tarehe iliyowekwa: November 29th, 2017

Mkurugenzi Mtendaji wa Halmashauri ya Mji Kondoa Khalifa Kondo ameridhishwa na kasi ya utekelezaji wa miradi ya maji inayoendelea katika Mji wa Kondoa.

Kauli hiyo aliitoa wakati wa ziara ya kutembelea miradi ya maji ambayo kwa kiasi kikubwa utekelezaji wake unaendana na mpangilio wa kazi zao.

“Wakandarasi nawapongeza sana kazi hii ni ya miezi sita lakini hata mwezi haujaisha mmefikia asilimia 40 ya kazi yote hii inaonyesha ni kiasi gani mpo makini na kazi yenu ya kufikisha huduma ya maji kwa wananchi”alisema Kondo.

Aidha alimshukuru Rais Dkt. John Magufuli kwa kuwapatia fedha za utekelezaji wa miradi hiyo ya maji katika mji wa Kondoa ambapo jumla ya shilingi bilioni tatu zitatumika katika usambazaji wa maji na kumaliza tatizo la maji.

Hata hivyo miradi iliyopongezwa ni mradi wa Kichangani ambao hadi sasa kisima kimechimbwa, ujenzi wa tanki unaendelea na ujenzi wa kituo cha pump house Tura, uchimbaji wa mtaro wa kupitishia mabomba ya maji umekamilika na ujenzi wa vituo vya kuchotea maji.

Mradi mwingine ni wa mtaa wa Kwapakacha ambao unaendelea na ujenzi wa matenki mawili ya kuhifadhia maji, ujenzi wa vioski nane vya kuchotea maji na uchimbaji wa kisima.