"Wakulima jiandikisheni kwenye daftari la ruzuku ya mbolea"- Afisa Kilimo

Tarehe iliyowekwa: September 3rd, 2022

Wakulima Halmashauri wametakiwa kujiandikisha kwenye daftari la ruzuku ya mbolea yanayopatikana kuanzia leo kwa maafisa ugani katika mitaa  ili kupata mbolea ya ruzuku msimu wa kilimo utakapoanza.

Hayo yamesemwa na Mkuu wa Idara ya Kilimo na Mifugo Ndg. Hassan Kiseto alipokuwa akitoa ufafanuzi wa upatikanaji wa mbolea ya ruzuku wakati wa kikao cha wafanyabiashara na Mkuu wa Wilaya kilichofanyika katika Ukumbi wa Kondoa Irangi hivi karibuni.

“Daftari hili litatumika kuwasajili wakulima wote wanaofanya shughuli za kilimo ndani ya eneo la Halmashauri ya Mji Kondoa ili wapate namba zitakazowawezesha kwenda kwenye maduka ya mawakala waliochaguliwa kutoa mbolea za ruzuku na wao wakulima watalipa fedha kiasi na serikali itatoa kiasi na namba hizo zitakuwa kwenye mfumo,”amesema Ndg. Kiseto

Aidha amesema kutokana na vita inayoendelea ya Ukraine gharama za mbolea zimepanda hivyo serikali itampunguzia mzigo mkulima atakayejisajili katika daftari kwa kumlipia kiasi cha fedha na yeye mwenyewe atalipa fedha nyingine lengo ni kuhakikisha wakulima wanaendelea na shughuli zao za uzalishaji kwa gharama nafuu.

Madaftari hayo yanapatikana kwa Maafisa Ugani wa mitaa wote na kwa mitaa isiyo na mafisa ugani wametakiwa kuwasilisiliana na maafisa Ugani wa kata ili wawaelekeza madaftari yanapopatikana aidha uandikishaji huo ni bure kwa wakulima wote.