Wakuu wa Idara watakiwa kusimamia miradi

Tarehe iliyowekwa: January 31st, 2024

Wakuu wa Idara Halmashauri ya Mji Kondoa wametakiwa kusimamia miradi inayotekelezwa chini ya idara zao ili itekelezwe kwa ubora na wakati kwa lengo la kufanya kazi zilizokusudiwa.

Kauli hiyo imetolewa na Mwenyekiti wa Halmsahauri ya Mj Kondoa Mhe. Mohamed Kiberenge wakati wa kikao cha majumuisho ya ziara ya Kamati ya Fedha na Utawala robo ya pili mwaka 2023/2024 katika ukumbi wa Halmashauri ya Mji Kondoa.

“Kila mmoja akisimama kwenye miradi yake tutaepukana na mengi ikiwemo madeni yanayotokana na miradi inayotekelezwa na mkiwa makini hakuna kitakachoharibika kwani mtakuwa karibu na miradi yenu,”amesema Mhe. Kiberenge

Aidha kamati imeagiza kukamilika kwa marekebisho yanayofanyika katika majengo yaliyojengwa katika Hospitali ya Halmashauri ya Mji Kondoa ili majengo hayo yaanze kutoa huduma kusudiwa kwa wananchi na kupongeza kwa marekebisho yaliyofanyika.

Hata hivyo wakati wa ziara hiyo kamati imepokea taarifa za miradi mbalimbali iliyotembelewa na kuwasisitiza wasimamizi wa miradi hiyo kutunza nyaraka za miradi yao ili kuwa na kumbukumbu sahihi za miradi hiyo.

“Serikali imeleta fedha nyingi za kutekeleza miradi tuitekeleze kwa uaminifu mkubwa na tuepuke miradi hii kuzalisha hoja za ukaguzi taratibu za muhimu zinazotakiwa kufuatwa zifuatwe mwakani tusione hoja za Mkaguzi Mkuu kwani ni aibu kwa Halmashauri na tukiamua tunaweza,”amesisitiza Mhe. Kiberenge.

Wameongeza kwa kuwasisitiza wakuu wa shule kushirikiana na ofisi za watendaji wa Mitaa na Kata kuhakikisha wanaendelea kuwahamasisha wazazi kuchangia chakula cha wanafunzi kwa kuwaeleza umuhimu wa chakula kwa mwanafunzi wakati wa kujifunza.

Akiongea kwa upande wake Mkurugenzi wa Halmashauri ya Mji Kondoa Ndg. Paul Sweya amewashukuru Waheshimiwa Madiwani kwa kuwa jicho katika miradi kwani kwa kufanya hivyo kunawasaidia kuona wanapokosea na kurekebisha mapema ikiwa ni pamoja na kuahidi kuyafanyia kazi mapungufu yote waliyoyaona.

Ziara ya kamati ya fedha imetembelea miradi inayotekelezwa kwa mwaka wa fedha 2023/2024 ambayo imekamilika na ambayo inaendelea na utekelezaji ikiwemo mradi wa ujenzi wa nyumba ya Mkurugenzi, ukarabati shule ya Msingi Kondoa, umaliziaji madarasa Mtobubu Sekondari, ujenzi wa majengo Hospitali ya Mji, ujenzi wa madarasa shule ya Wasichana Kondoa, ukaguzi wa zana za kujifunzia Shule ya Msingi Kichangani na Migungani ambapo pia waliongozana na Wakuu wa Idara.