Walimu Tutumie Fursa Ya Makao Makuu Kuwa Dodoma

Tarehe iliyowekwa: April 13th, 2018

Mkurugenzi wa Halmashauri ya Mji Kondoa Khalifa Kondo amewataka walimu kutumia fursa ya Mkoa wa Dodoma kuwa makao makuu ya nchi ili kuinua ufaulu wa wanafunzi wilaya ya Kondoa.

Hayo ameyasema katika kikao cha kujadili hali ya ufaulu na jinsi ya kuinua elimu ndani ya halmashauri kilichofanyika katika Shule ya Sekondari Kwapakacha hivi karibuni.

“Haiwezekani halmashauri kutoka kilomita elfu moja kutoka makao makuu wanaongoza sisi kilomita mia tukashindwa na sasa nchi ipo Dodoma fursa zote za kuonana na viongozi wa elimu na wanaotoa miongozo, kutafsiri sera zipo tunashindwaje kuinua elimu kuanzia sasa hatukubali kushindwa.”alisema Kondo

Aliongeza kuwa walimu wanapaswa kushindana katika ubunifu wa kupandisha elimu wakati halmashauri inaona jinsi ya kuwapatia motisha walimu watakaofaulisha vizuri ikiwa ni pamoja kutatua matatizo yanayowakabili.

Aidha amewataka walimu hao kupitia kikao hicho muhimu kujadili  umuhimu wa kuinua elimu wilayani  na kuwataka  kutimiza wajibu wao  wa  kimsingi kabla ya kudai haki zao na baada ya kikao hicho walimu watakaoshindwa kutimiza majukumu yao hatua zitachukuliwa dhidi yao.

Kwa upande wake Afisa Elimu Sekondari Halmashauri ya Mji akiwasomea sababu za wanafunzi kutofanya vizuri zilizotolewa na wasahihishaji wa mitihani kitaifa alisema walimu wanachangia kutofaulu wanafunzi ikiwemo sababu ambazo zinatokana na wanafunzi wenyewe hivyo ufaulu unategemea jitihada za mwalimu na mwanafunzi.

Akitaja baadhi ya sababu hizo ni pamoja na utoro wa walimu, walimu kutokuwa na malengo ya ufundishaji, walimu kuwakatisha tamaa wanafunzi kusoma baadhi ya masomo, uchache wa walimu wa sayansi, wanafunzi kutokuwa na mazoea ya kujisomea baada ya muda wa masomo na mmomonyoko wa maadili ya wanafunzi.

Kikao cha kujadili mikakati ya kuinua elimu katika shule za sekondari Halmashauri ya Mji Kondoa kimefanyika kwa kuwakutanisha wakuu wa Idara za masomo na wawakilishi wa walimu kutoka shule zote wanaofundisha darasani ili kuona changamoto na jinsi ya kuzikabili ili kuinua kiwango cha elimu wilayani.