Walimu wa Sekondari Kondoa Mji wapewa vishkwambi

Tarehe iliyowekwa: January 15th, 2023

Walimu wa Shule za Sekondari katika Halmashauri ya Mji Kondoa wamepewa vishkwambi 177 vilivyotolewa na Serikali kuu ikiwa ni sehemu ya kuboresha mazingira ya ufundishaji kwa walimu hao.

Hafla ya makabidhiano imefanyika katika ukumbi wa Shule ya Sekondari ya Wasichana Kondoa ambapo iliongozwa na Afisa Elimu SekondariHalmashauri ya Mji Kondoa Mwalimu Annette Nara na kuhudhuriwa na walimu wote wa Sekondari.

Akiongea katika hafla hiyo Afisa Elimu amesema wametoa vishkwambi hivyo kwa walimu hao ili waende wakavitumie katika kufundishia na kujifunzia ikiwa ni pamoja na kupata mada mbalimbali za kielimukwa njia ya kielektroniki.

“Tuna imani vishkwambi hivi vitawasaidia pia katika kupata vitabu kutoka Taasisi ya Elimu Tanzania ambavyo vinapatikana kwa nakala laini ambavyo vitawaongezea maarifa wallimu wetu lakini pia vitawasaidia  katika kupitia majarida mbalimbali ya kielimu yatakayowasaidia kuboresha uelewao utakaowaongezea maarifa ya ufundishaji,”amesema Afisa Elimu Nara

Aidha katika hafla hiyo Afisa Elimu alimeongelea suala la taaluma ambapo wamekubaliana na walimu kuhakikisha wanafundisha masomo yao na wanafunzi wanafaulu masomo wanayofundisha na amewapongeza  walimu wa Shule ya Sekondari Dilai kwa kufanya vizuri katika mtihani wa kidato cha pili na kuwapa moyo walimu waliofeli kuhakikisha wanasahihisha makosa yao na kujipanga upya.

“Walimu mkajitume kila mmoja kwa nafasi yake akafanye jambo na tuwe tayari kujifunza kwa waliofanikiwa achaneni na tabia ya kutanguliza changamoto nyingi angalieni mbele mnaweza mkiamua na muache kuwadharau wakuu wenu wa shule kwani baadhi wamevunjika moyo sababu hamuwaheshimu,”amesisitiza Afisa Elimu

Amewataka kila mmoja kujitafakari namna anavyomtii Mkuu wa Shule na jinsi anavyotekeleza majukumu anayopewa na kiongozi wake na kuwataka kuwa  waadilifu na waaminifu wakati wa utekelezaji wa majukumu yao ili wafikie ndoto zao.

Hata hivyo ametoa wito kwa wazazi kuchangia chakula cha watoto wao shuleni ili wapate chakula cha mchana shuleni na kusoma kwa masaa ya ziada kwa lengo la kuinua kiwango cha elimu cha watoto wao kwani mwaka jana wazazi wengi hawakuchangia chakula.

Akiongea kwa niaba ya walimu wengine Afisa Elimu kata ya Bolisa Mwalimu Adray Kikoti ameishukuru serikali kwa kuwapatia vishkwambi na wosia wa Afisa Elimu kwa walimu kwa kuwa ana imani maneno yake yatasaidia walimu wengi kubadilika.

Katika hafla hiyo jumla ya vishkwambi 177 vimetolewa kwa Maofisa wa Idara ya Elimu Sekondari, Maafisa Elimu Kata, Wakuu wa Shule na walimu wote wa Sekondari za Halmashauri ya Mji Kondoa.