WALIMU WAKUU WAONYWA KUKAA MJINI

Tarehe iliyowekwa: January 18th, 2018

Walimu wakuu wa Shule za Msingi katika Halmashauri ya Mji Kondoa wametakiwa kuhamia katika maeneo ya shule zao na kuachana na dhana ya kukaa mjini hali inayopelekea kushuka kwa kiwango cha ufaulu wa shule.

Akiongea wakati wa kikao cha kujadili changamoto na mikakati ya kuongeza ufaulu kwa elimu ya Msingi Mkurugenzi wa Mji Khalifa Kondo alisema kuwa walimu wengi wanakaa mjini badala ya kwenye vituo vyao walivyopangiwa hali ambayo inawauwia vigumu kujua changamoto za shule zao na jinsi ya kuzitatua.

Aidha aliwataka walimu wakuu wote kuhamia katika maeneo yao ya shule mara moja na kusema kuwa hatamuonea aibu Mwalimu Mkuu yeyote ambaye hatahamia kituoni kwake kwani mtumishi wa umma hatakiwi kuchagua sehemu ya kufanya kazi.

Hata hivyo aliongeza kuwa Halmashauri inaendelea kuboresha mazingira yao ya kazi lakini changamoto zingine zinaweza kutatuliwa kwa uwepo wao katika vituo vyao vya kazi na kuwaagiza waratibu elimu kata kusimamia suala hilo na kuhakikisha Walimu Wakuu wote wanakaa vtuoni.

Kwa upande wake Afisa Elimu Vifaa na Takwimu Mwalimu Onael Nyange aliongeza kuwa Walimu Wakuu wanawajibu wa kuwasimamia walimu wao kwa kudhibiti utoro lakini itakuwa ni vigumu kwao kutekeleza hilo iwapo wao wenyewe hawakai vituoni japokuwa walishaitwa na kutakiwa kuhamia vituoni mwao.

Kikao cha kujadili changamoto za mikakati ya kuinua elimu Msingi Kondoa Mji kilifanyika hivi karibuni ambapo kilihudhuriwa na Mkurugenzi wa Mji, Maafisa Elimu, Mdhibiti ubora wa Shule, Katibu wa Tume ya Utumishi wa Walimu na Walimu Wakuu.