Waliokopa mikopo ya vijana na wanawake watakiwa kulipa madeni

Tarehe iliyowekwa: May 7th, 2024

Wananchi waliokopa mikopo iliyotolewa na Ofisi ya Waziri Mkuu kwa ajili ya wanawake na vijana wanatakiwa kurudisha fedha hizo kama makubaliano ya awali yalivyokuwa ili kuepusha Halmashauri kulipa deni hilo.

Hayo yamesemwa na Mkuu wa Wilaya ya Kondoa Mhe. Dkt. Khamis Mkanachi wakati akiongea katika mkutano wa baraza la madiwani la robo ya tatu lililofanyika katika ukumbi wa mikutano wa Halmashauri ya Mji Kondoa.

“Mwaka huu pia niwakumbushe tuna Mwenge wa Uhuru ambapo tutakimbiza tarehe 30 ambapo tutaupokea Bicha kutoka kwa wenzetu wa Chamwino tukakimbiza Kondoa Mji halafu Kondoa Vijijini lakini jambo moja ambalo ni sharti kwa mwaka huu kuna zile fedha za mkopo kutoka kwa Ofisi ya Waziri Mkuu kwa kinamama na vijana Kondoa Mji tunadaiwa milioni 32 Mwenge hautapiga hatua hadi risiti ya mikopo ionekane,”amesema Dkt. Mkanachi

Aidha ameitaka Divisheni ya Maendeleo ya Jamii  kuwabainisha wote wanaodaiwa ili wajulikane ikiwa ni pamoja na kuelezwa kiasi wanachodaiwa ili walipe mikopo yao huku akitaka siasa kuwekwa pembeni katika jambo hili na kuhakikisha madeni yote yanakamilishwa kabla Mwenge wa Uhuru haujafika wilayani.

Ameendelea kwa kuwaomba madiwani kuimarisha umoja wao wakati wa kipindi hiki kuelekea uchaguzi wa serikali za mitaa kwa kuhakikisha wanamaliza tofauti zao ndani na kutatua changamoto zinazowakabili wananchi na kuacha kuwa sehemu ya kuchochea migogoro ya wananchi.

Kwa upande wake Mwenyekiti wa Halmashauri ya Mji Kondoa amesema Mhe. Mohamed Kiberenge amewataka madiwani wa Halmashauri ya Mji Kondoa kuwa wamoja na kushirikiana na viongozi wa mitaa ili kuongoza watu na kuwaweka pamoja na kuepuka kuweka makundi kuelekea uchaguzi wa serikali za mitaa.

“Katika yote yanayoenda kufanyika ushauri wa chama lazima uzingatiwe kwa kuwa kila kinachoenda kufanyika kwasababu sisi tupo chini ya mwamvuli wa Chama Cha Mapinduzi lazima tukubaliane ni jinsi gani tunakwenda kuhakikisha maendeleo ya wananchi yanakwenda kufanikishwa,”amesisitiza Mhe. Kiberenge

Naye Mwenyekiti wa Chama Cha Mapinduzi Wilaya ya Kondoa Mhe. Khadija Suru amewataka Waheshimiwa kwenda kushirikiana katika kutangaza kazi kubwa ya utekelezaji wa miradi iliyofanywa na serikali ya awamu ya sita kwa kipindi chote cha uongozi wa Rais Dkt. Samia Suluhu Hassan.

Mkutano wa Baraza la Waheshimiwa umefanyika ambapo taarifa za utekelezaji za kamati za kudumu za Uchumi, Mazingira, Fedha na Utawala na UKIMWI kwa kipindi cha robo ya tatu Januari-Machi 2024 zimesomwa na kuhudhuriwa na Wakuu wa Idara na wananchi.

Halmashauri ya Mji Kondoa ni moja ya Halmashauri zilizonufaika na mikopo iliyotolewa na Ofisi ya Waziri Mkuu katika mwaka wa fedha 2018/2019 kwa ajili ya kuwakopesha vijana na wanawake ambapo ilipata zaidi ya shilingi milioni 40 na kukopesha kwa vikundi ambavyo baadhi havijarejesha hadi sasa na juhudi za kuhakikisha wanalipa mikopo hiyo zinaendelea.