Waliovamia Swagaswaga Wapewa Siku 14 Kuondoka

Tarehe iliyowekwa: January 8th, 2019

Mkuu wa wilaya ya Kondoa Mhe. Sezaria Makota ametoa siku 14 kwa wananchi wote waliovamia hifadhi  ya pori la akiba la Swagaswaga kuondoka ndani ya hifadhi kabla ya kuondolewa kwa nguvu.

Ameyasema hayo alipokuwa akiongea katika mikutano ya hadhara  na wananchi wa mitaa ya Mongoroma na Serya ili iliyofanyika katika maeneo hayo.

Aliongeza kuwa serikali inayafanya hayo ili kuendelea kuhifadhi rasilimali muhimu zilizomo ndani ya hifadhi hiyo ili ziongezeke na kuongeza idadi ya watalii ambao watakuja kwa wingi kupumzika ndani ya hifadhi baada viongozi mbalimbali kuhamia Dodoma.

“Ni wakati maalum sasa watu waheshimu mipaka ya hifadhi na wasikae ndani ya hifadhi sababu serikali ina mkakati  wake madhubuti wa kuendeleza hifadhi zote kama sehemu ya kuongeza pato la nchi”.Alisema Mhe. Makota

Aliongeza kuwa kaya zote zilizomo ndani ya hifadhi na zinafahamika hivyo ni wakati muafaka kwa wao kuondoka  na kuacha kulima kwa mwaka huu kwani wapo waliokata misitu na kuandaa mashamba.

“Pia kwasasa serikali imefanya utaratibu wa kuandaa mpango wa matumizi bora ya ardhi katika maeneo ya wananchi wanaopakana na hifadhi ambapo kwa sasa wapo katika vijiji vinavyopakana na Tarangire ambapo pia ipo katika wilaya ya Kondoa lengo likiwa ni kuweka matumizi ya kila ardhi husika.”Alifafanua Mhe. Sezaria

Aidha akiuliza kwa niaba ya wananchi wengine Bwana Hassan Juma alitaka kujua wananchi walio ndani ya hifadhi na walishafanyiwa tathmini watalipwa lini sababu wameshaambiwa wahame?

Akijibu meneja wa pori la Swagaswaga Bwana Choya Alex alisema kuwa kuna zoezi lililofanyika ni la kutambua kuna kaya ngapi  ndani ya hifadhi kutokana na maelekezo ya wizara na ilifanyika kama   kama sensa na si uthaminishaji ambao huusisha watu wa kada mbalimbali.

“ Wale walikuwepo kuanzia miaka ya sabini huwezi kumtoa hivyohivyo kuna kanuni na sheria za kufuata kwa hiyo tutapata maelekezo kutoka katika mamlaka husika kujua waliokuwepo kwani taarifa na majina yapo.”Alisisitiza Choya

Notisi hii ya siku kumi na nne inaisha tarehe 22/01/2019 ambapo wananchi wote waliovamia pori la akiba la Swagaswaga wanatakiwa kuondoka na imetolewa na mkuu wa wilaya katika vikao vilivyokaliwa katika mitaa ya Serya na Mongoroma.