Wamshukuru Mhe. Rais kuwajengea kituo cha Afya Serya

Tarehe iliyowekwa: September 29th, 2022

Wananchi wa kata ya Serya Halmashauri ya Mji Kondoa wamemshukuru Rais Mhe. Samia Suluhu Hassan kwa kuwajengea  kituo cha Afya kutokana na fedha za tozo za miamala ya simu ambapo kwasasa wanapata huduma katika kituo hicho.

Shukrani hizo wamezitoa wakati wa mahojiano yao na Afisa Habari alipotembelea katika kituo hicho kuona huduma zinazotolewa atika kituo hicho hivi karibuni.

“Kabla ya kujengwa kwa kituo hiki wakinamama wajawazito walikuwa wakipata changamoto kubwa wakati wa kujifungua hasa wakati wa masika mto Bubu ukijaa hawezi kuvuka kwenda kupata huduma Kondoa Mjini na wengine wamepoteza maisha kwa kweli hali ilikuwa mbaya,”amesema Anna Uruwa Mtendaji wa Mtaa wa Mongoroma kilipojengwa kituo hicho.

Ameongeza kwa kusema kuwa baada ya kujengewa kituo hicho wajawazito kwasasa hawapati shida kama awali kwani wanapata huduma zote katika kituo hicho hali ambayo pia imewasaidia kufanya shughuli zingine za kujiongezea kipato kwa kuwa huduma imesogezwa kwa karibu.

Kwa upande wake Bwana amesema pamoja na kupatikana kwa kituo hicho wanaomba kujengewa wodi ya wanaume na wanawake ili inapotokea mgonjwa anatakiwa kulazwa alazwe katika kituo hicho ikiwa ni pamoja na kuletewa wataalam wa afya wa kutosha.

Akizungumza awali Mganga Mkuu wa Halmashauri ya Mji Kondoa Dkt. Sisty Mosha amesema huduma zitakazotolewa  katika kituo hicho ni huduma ya mama na mtoto, huduma za macho, huduma za upasuaji mdogo, kliniki za mama na mtoto, wagonjwa wa nje na huduma meno.

Kituo cha Afya Serya kimejengwa kwa gharama ya shilingi milioni 500 fedha zilizoletwa kutoka serikali kuu na zimetokana na tozo za miamala ya simu ambapo majengo yaliyokamilika mpaka sasa ni jengo la wagonjwa wa nje, jengo la mama na mtoto, maabara, jengo la kufulia na kichomea taka na huduma zimeanza katika kituo hicho.