Wanafunzi darasa la Saba waaswa kumuomba Mungu

Tarehe iliyowekwa: September 3rd, 2019

Wanafunzi wanaotarajia kumaliza elimu ya Msingi mwezi Septemba 2019 wameshauriwa kumuomba Mwenyezi Mungu kabla ya mtihani, wakati wa mtihani na baada ya mtihani ili awape afya njema na kupata matokeo mazuri.

Ushauri huo ulitolewa na Mkurugenzi wa Halmashauri ya Mji Kondoa alipofanya ziara ya kuwatembelea wanafunzi wanaotarajia kumaliza darasa la saba na kuongea na walimu wanaowafundisha wanafunzi hao ziara iliyofanyika hivi karibuni.

“Tumekuja kuwatia moyo na kuwasihi kuendelea kumuomba Mwenyezi Mungu kila mtu kwa imani yake ili muanze salama na kumaliza salama na tunaamini wote mtafanya vizuri mitihani yenu na mtafaulu ili kutimiza ndoto zenu.”Alisema Mkurugenzi Dakawa

Aidha aliendelea kuwashauri wanafunzi hao kusoma kwa bidii kwa kipindi kilichobakia na kuendelea kuwa na nidhamu na kuepuka kudanganywa kwenda kufanya kazi za ndani mikoani wanaposubiria matokeo yao kwani kwa kufanya hivyo ndoto zao za kuwa wataalamu hazitatimia.

Hata hivyo alitumia ziara hiyo kuongea na walimu kwa kuwashauri kuendelea kuwakumbusha wanafunzi mambo ya muhimu kuzingatia wakati wa mtihani ikiwa ni pamoja na kuwaonyesha upendo na kuwajenga kisaikolojia kwa kipindi kilichobakia ili kutowavuruga katika kipindi  kilichobakia.

“Walimu mliobahatika kuchaguliwa kusimamia mitihani nawasihi sana mfanye kazi hiyo kwa kufuata taratibu na kanuni mlizoelekezwa na mkajiepushe na udanganyifu wa namna yoyote kwani kwa kufanya hivyo mtazalisha viongozi wa baadae wadanyanyifu na wasio waaminifu kwa nchi.”Alisisitiza Mkurugenzi Dakawa.

Ziara ya Mkurugenzi imefanyika kwa shule za Msingi ambazo wanajiandaa kufanya mtihani wa kumaliza elimu ya msingi unaotarajiwa kufanyika tarehe 11 na 12 Septemba, 2019 na katika Halmshauri ya Mji Kondoa jumla ya wanafunzi 1716 wanatarajia kufanya mtihani huo katika shule 29 za Msingi.