WANAFUNZI KONDOA MJI WAMPONGEZA RAIS KUTIMIZA MIAKA MIWILI

Tarehe iliyowekwa: November 5th, 2017

 Wanafunzi wa Halmashauri ya Mji Kondoa wamemtumia salamu za pongezi Rais wa Jamuhuri ya Muungano wa Tanzania Mh.Dkt. John Pombe Magufuli kwa kutimiza miaka miwili katika uongozi wake.

Wakiongea wakati wa maadhimisho hayo yaliyofanyika katika viwanja vya ukumbi wa mikutano wa Kondoa Irangi wanafunzi hao wamesema kuwa  kipindi cha miaka miwili hiyo wameona manufaa mengi ikiwemo kukaa kwenye madawati ambapo awali walikuwa wakikaa chini jambo ambalo linawafanya waendelee kusoma kwa bidii.

Akiongea kwa upande wa  taaluma mwakilishi wa wanafunzi Latifa Abbas Ally amesema kuwa pia wanafunzi kwasasa wanatumia kitabu kimoja kwa kila mwanafunzi ambapo kwasasa wanapata hata fursa ya kwenda navyo nyumbani na kujisomea.

Ameongeza kuwa idadi ya wanafunzi imeongezeka na hakuna tena michango midogomidogo ambayo ilikuwa ikiwanyima fursa wanafunzi wasio na uwezo kwenda shule  na kupelekea kuongeza idadi ya wahalifu mitaani ambapo kwa miaka miwili hiyo jambo hilo halipo tena.

Aidha akiongezea salamu hizo kwa mkuu wa Wilaya ya Mkurugenzi wa Halmashauri ya Mji Kondoa  Bwana Khalifa Kondo amemwelezea kuwa kwa kipindi hicho cha miaka miwili mambo mengi yamefanyika ikiwemo kuboresha huduma za afya, elimu na kuondoa watumishi wasio na sifa ili kuwapa nafasi wasomi walio na sifa.

Hata hivyo aliongeza kuwa suala la madawa ya kulevya pia limepunguzwa kwa kiasi kikubwa katika kipindi hicho kwani vijana wengi wamejiajili kwa kuendesha pikipiki na kupelekea halmashauri ya mji kuwatengea eneo kwa ajili ya kupaki pikipiki zao na kutambulika kuwa ajira kamili ikiwa ni pamoja na kuwapa mikopo ya kujiendeleza.

Akipokea pongezi hizo kwa niaba ya Mheshimiwa Rais Mkuu wa Wilaya ya Kondoa Mh. Sezaria Makota amesema kuwa anawashukuru sana wanafunzi na watu waliojitokeza katika maadhimisho hayo kwani yote yaliyozungumzwa yana ukweli kwani kwa kipindi hicho madawa ya kulevya zaidi ya gunia kumi yalikamatwa na kuwashitaki wahusika wote.

“Amani imepatikana Kondoa kwani awali kulikuwa na migogoro ya wakulima na wafugaji lakini kwa kipindi hiki hakuna mauaji ya wakulima na wafugaji “.

Maadhimisho ya miaka miwili ya uongozi wa Rais Mh.Dkt. John Pombe Magufuli yamefanyika katika mji wa Kondoa ambapo watu mbalimbali walihudhuria wakiwemo kamati ya ulinzi na usalama ya wilaya, wanafunzi, waendesha pikipiki na viongozi mbalimbali wa Chama Cha Mapinduzi ambapo ushuhuda wa mambo yaliyofanyika kwa kipindi hicho ulitolewa.