Wanafunzi watakiwa kuvunja ukimya wanapofanyiwa vitendo vya ukatili

Tarehe iliyowekwa: November 30th, 2022

Wanafunzi wa shule za msingi na sekondari katika Halmashauri ya Mji Kondoa wametakiwa kuongea ukweli pindi wanapofanyiwa vitendo vya aukatili ili kutimiza ndoto zao.

Kauli hiyo imetolewa na Mkuu wa Idara ya Maendeleo ya Jamii Halmashauri ya Mji Kondoa Ndg. Irene Mosha wakati wa ziara ya kutoa elimu ya ukatili wa kijinsia kwa wanawake na watoto katika shule za msingi na sekondari ikiwa ni sehemu ya utekelezaji wa siku 16 za kupinga ukatili wa kijinsia.

"Watoto mjilinde na mafisi ambao ni watu wabaya wanaovunja haki za watoto kwanza msome kwa bidii kwa kuwa haki ya kusoma iko kwenu ndio maana mnaona serikali inajenga madarasa, imeleta walimu inachinga barabara ili nyie tu msome vizuri, lakini kwasasa watoto wa kiume mnafanya mchezo mbaya wa kulawitiana na hapa shuleni mpo kuanzia sasa muache,"amesema Irene

Ameongeza kuwa wavulana wanaofanyiwa ulawiti madhara hawatayaona kwasasa badala yake ji miaka ya mbele ambapo kitendo hicho kitawafanya wao washindwe kuwa baba bora ikiwa ni pamoja na kutokwa na haja kubwa wakati wote hivi wanapaswa kuacha kufanya vitendo vya ulawiti na kusema wanapofanyiwa.

"Michezo hii mnaifanya pia mnapoenda kuchunga ng'ombe mnawaacha kule nyie mnafanyiana huku acheni na watoto wa kike msikubali kulala na wajomba na kina babu wanawadanganya wanawaingilia na hamsemi semeni ili muokolewe wanachowafanyia ni ukatili mvunje ukimya mseme ukweli mwambieni mtu yoyote kama ni mzazi, mwalimu au mtu mzima yoyote ili awasaidie,"amesisitiza Irene

Aidha amewataka wanafunzi wote wanaoenda kwenye mabanda ya video kuangalia mipira kuacha mara moja kwani wengine wamekuwa wakifanyiwa vitendo vya ukatili huko na kujifunza mambo yasiyofaa ikiwa ni pamoja na kuacha kutumia simu za kupangusa kwa kuwa si umri sahihi kwao kutumia kwa kuwa wanaweza kujifunza mambo yasiyofaa huko.

Kwa upande wake Afisa Maendeleo ya Jamii Ndg. Ally Mwinyikombo amesema si kubakwa tu ndio vitendo vya ukatili hata kushikwa maziwa, kukonyezwa na kuambiwa na wazazi wasifanye vizuri katika mitihani yao ili wafeli ni ukatili kwani kunawapelekea kukosa nafasi ya kuendelea na masomo ya sekondari hali itakayowapelekea kuwa wategemezi.

"Tumekuja leo kuwapatia elimumili mvijue vitendo vyote vya kikatili mnapofanyiwa waambieni walimu wenu tumewaachia namba zetu za simu ili tuwachukulie hatua wote wznaowafanyia vitendo hivyo kwa lengo la kuhakikisha vitendo hivyo vinakomeshwa katika jamii, na mjue mkilindwa na nyie mjilinde msifanyiwe vitendo hivyo ili mtimize ndoto zenu hapo baadae,"amesema Mwinyikombo

Hata hivyo amewataka kujilinda ili kuepuka kuambukizwa Virusi vya UKIMWI ambavyo kwasasa imekuwa ni janga kubwa kwa vijana wa umri wa miaka 14 hadi 25 na wengi wanaofanyiwa ukatili wa kingono wanaathirika kwa kiasi kikubwa hali itakayopelekea kukosa vijana wakuliongoza taifa hapo baadae.

Vipeperushi vya ujumbe wa kupinga ukatili na Elimu ya ukatili imetolewa kwa zaidi ya wanafunzi 900 katika shule za sekondari za Dilai na Serya na shule za Msingi za Bolisa, Itiso, Iyoli na Munguri lengo likiwa ni kufikia shule zote za Halmashauri ya Mji Kondoa kwajili ya kuadhimisha siku 16 za kupinga ukatili duniani ambapo huadhimishwa kuanzia terehe 25 Novemba hadi tarehe 10 Desemba na mwaka huu imebeba ujumbe usemao "kila uhai una thamani,tokomeza mauaji na ukatili dhidi ya wanawake na watoto."