Wanakondoa waaswa kudumisha amani na utulivu

Tarehe iliyowekwa: November 18th, 2023

Wananchi wa Wilaya ya Kondoa Mkoani Dodoma wametakiwa kudumisha amani na utulivu kwa kufanya matendo mema na yaliyo na tija kwa Taifa.

Hayo yamesemwa na Mkuu wa Mkoa wa Dodoma Mhe. Rosemary Senyamule wakati wa Bonanza la Michezo na kuuelezea umma mafanikio ya awamu ya sita ndani ya Wilaya ya Kondoa liliondaliwa na Mkuu wa Wilaya ya Kondoa Dkt .Khamis Mkanachi na kufanyika katika viwanja vya Sabasaba Wilayani Kondoa.

"Nitoe Shime tuendelee kuimarisha Amani na Utulivu pia tuendelee kufanya matendo mema ambayo yatapelekea nchi Yetu ya Tanzania Kuendelea kuwa na Amani kwasababu Rais wetu ametamani tupendane, tushikamane na tuwe na umoja na ameanza kuyafanya, kupishana kwenye jambo sio kufarakana mnapopishana  mkae mezani kuangalia chanzo cha tatizo na kulimaliza Kama Watanzania," amesema Senyamule

Aidha amewaambia wanakondoa kuwa katika mkoa wa Dodoma Rais Dkt. Samia Suluhu Hassan kuwa kwa kipindi cha mwaka mmoja 2022/23 amejenga jumla ya shule 47 mpya ikiwa ni jambo ambalo halijawahi kushuhudiwa awali na uwepo wa shule hizo kutasaidia kwa kiwango kikubwa kuongeza kiwango cha elimu Tanzania.

Kwa Upande wake Mkuu wa Wilaya hiyo Dkt. Khamis Mkanachi amebainisha kuwa licha ya Bonanza Hilo kujikita katika kuelezea na kuonyesha mafanikio hayo ya awamu ya Sita pia ametaka Bonanza Hilo litumike Kama uwanja wa wanafunzi kumfahamu vizuri Dkt. Samia kwani ni tunu ya Taifa.

Aidha Dkt. Mkanachi ameweka bayana kuwa katika kipindi cha Miaka 3 ya Rais Samia madarakani Wilaya ya Kondoa imepokea Billioni 52.634 za utekelezaji wa miradi mbalimbali ya kimaendeleo na yenye tija kwa Wananchi wa Wilaya hiyo.

Bonanza la michezo limefanyika kwa lengo la kuujulisha umma wa Kondoa mafanikio ya serikali ya awamu ya sita chini ya Rais Dkt. Samia Suluhu Hassan ambapo pia ilifanyika ikiwemo mpira wa miguu,kukimbiza kuku, kukuna nazi, kutembea ndani ya magunia, kuvuta kamba na shindano la kula pilipili na matembezi ya hisani yaliyoanzia katika Barabara ya Darajani Hadi viwanja vya Saba Saba Kondoa Mjini.