Wananchi Kingale wapongezwa kujitolea ujenzi wa miradi ya maendeleo

Tarehe iliyowekwa: July 29th, 2024

Wananchi wa kata ya Kingale katika Halmashauri ya Mji Kondoa wamepongezwa kwa jitihada zao za dhati za kujitoa katika kuchangia miradi ya maendeleo ambapo wamekuwa wakijenga madarasa katika shule za msingi hali inayoonesha jinsi wanavyounga mkono juhudi za uletaji wa fedha za maendeleo unaofanywa na Serikali.

Pongezi hizo zimetolewa na Mwenyekiti wa Halmashauri ya Mji Kondoa Mhe. Mohamed Kiberenge alipokuwa akiongea na wananchi wa Kata ya Kondoa Katika mkutano wa kusoma utekelezaji wa shughuli za maendeleo kwa kipindi cha miaka minne katika kata hiyo.

“Kazi yangu mimi ni kuhakikisha nawaunganisha wanakondoa na wanahalmashauri ya mji kuelewa umuhimu wa kushiriki katika shughuli za maendeleo lakini kuwaelekeza namna serikali yetu inavyofanya kazi na jinsi inavyoshusha fedha ambazo zipo katika makundi matatu ambayo ni fedha za Serikali Kuu, wahisani na mapato ya ndani”amesema Mhe. Kiberenge

Ameendelea kueleza kuwa kwa kipindi cha miaka minne kwa kushirikiana na viongozi waliopo madarakani wameona fedha zilizoletwa ambazo zimelenga katika kutatua changamoto za wanaKingale katika sekta ya afya, elimu, maji na umeme japokuwa changamoto zipo chache na zinaendelea kufanyiwa kazi.

Amempongeza Rais Mhe. Dkt. Samia Suluhu Hassan kwa kuruhusu fedha za utekelezaji wa maendeleo kuletwa katika kata ya Kingale kwa lengo la kuwasogezea huduma kwa karibu wananchi na kuwahakikishia wananchi hao kuwa fedha hizo zitaendelea kusimamiwa na kutumiwa kama ilivyopangwa hivyo wawe na imani na baraza la Madiwani katika usimamizi.

Akiongea awali Kaimu Afisa Mipango Ndg. Agnes Chekani amesema kwa kipindi cha miaka minne Serikali imeleta shilingi bilioni 2 za maendeleo katika kata ya Kingale ambazo zilielekezwa katika barabara, maji, umeme, ukamilishaji wa zahanati ya Tampori, Ujenzi wa madarasa, vyoo na Maabara Dilai Sekondari, ujenzi wa madarasa Shule ya Msingi Kingale na Iyoli ambapo kwasasa zimeletwa fedha kwa ajili ya ujenzi wa madarasa Shule ya Msingi Chemchem na Dilai Sekondari.

“Pili nataka niwapongeze wana Kingale pia kwa kujitolea kujenga madarasa Kingale Chini, Shule Shikizi Msui na Kwamtwara mna nia ya kujitolea na mwaka huu tutaleta fedha milioni 197 kwaajili ya kukamilisha madarasa ambayo mliiyanzisha katika mitaa ya Kwamtwara, King’ang’a’,Tampori, Msui na Kingale Chini japokuwa tumeshaleta shilingi milioni 5 kwa ajili ya kupaua wa madarasa yaliyojengwa,”amesema Kaimu Afisa Mipango

Aidha ameongeza kuwa Serikali imeleta zaidi ya shilingi milioni 540 kwa ajili ya kujenga shule ya ufundi ili watoto wanaomaliza shule wajiunge na kupata ujuzi mbalimbali utakaosaidia kujitegemea kwa pamoja ambapo shule ya Sekondari Dilai itakuwa ya kidato cha tano na sita.

Pia wananchi walipata fursa ya kuongea ambapo waliishukuru Serikali kwa kuwaletea fedha nyingi katika kata yao nakuomba kumaliziwa umeme mitaa michache iliyobakia na kusaidia kupatikana na kwa walimu kwa kuwa shule zipo nyingi ambapo kwasasa wanawalipa walimu wa kujitolea katika baadhi ya shule ili kuhakikisha watoto wao wanapata elimu stahiki.

Kaimu Mkurugenzi wa Halmashauri ya Mji Kondoa Mwalimu Hassan Mtamba amewapongeza wazazi kwa kujitolea kuwalipa walimu wanajitolea na kuahidi kuleta walimu kadri serikali inavyowaleta ili kuondoa tatizo hilo ambapo serikali inafanya kila jitihada za kuhakikisha walimu wanaajiriwa na kusambazwa katika shule zote.

Mwenyekiti wa Halmashauri ya Mji Kondoa ameanza ziara ya siku 8 ya kusoma utekelezaji wa miradi ya maendeleo kwa wananchi wa kata 8 ambapo pia ameongozana na wataalam mbalimbali kutoka Halmashauri ya Mji Kondoa.