Wananchi Mtaa wa Tampori wajitolea kujenga Zahanati

Tarehe iliyowekwa: July 29th, 2019

Wananchi wa Mtaa wa Tampori kata ya Kingale wamekubaliana kwa kauli moja kujenga Zahanati ili kuepukana na adha wanayoipata katika kutafuta huduma za matibabu wakati wa masika.

Makubaliano hayo yamefikiwa wakati wa mkutano wa hadhara ulioitishwa na Mheshimiwa diwani wa kata hiyo na kuwasirikisha wataalam kutoka Halmashauri ya Mji mkutano uliofanyika katika mtaa huo hivi karibuni.

Akiongea mmoja wa wananchi wa kata hiyo Bwana Selemani Said alisema kuwa wananchi wa mtaa huo wana shauku kubwa ya maendeleo hivyo wako tayari kujenga Zahanati ingawa wanachangamoto ya kukosekana kwa umeme na barabara watasubiri kwa kuwa Zahanati ina umuhimu kwao kwa sasa.

“Wananchi wa Tampori tunapata sana shida wakati wa masika tunakuwa kama tupo kisiwani tunapohitaji huduma za afya sababu mito yote hufurika maji mtufikirie sana katika hilo tupo tayari kuchangia nguvu zetu zote na tumeshatenga eneo la ekari saba kwajili ya ujenzi.” Alisisitiza Bwana Selemani.

Kwa upande wake Afisa Mipango wa Halmashauri ya Mji Kondoa Kaunga Amani aliwashukuru wananchi kwa kujitoa kwao na kuahidi kuwaunga mkono wananchi hao ili kuhakikisha ujenzi unaanza hadi unakamilika na kuwataka agenda ya ujenzi iwe ya kudumu kila mahali.

“Wiki ijayo nitakuja na Mhandisi Ujenzi, Afisa Ardhi na Mganga Mkuu ili kuona eneo lililotengwa na kupimwa , baadae tutapata mchanganuo wa fedha zinazohitajika kukamilisha mradi na utaitishwa mkutano wa kupanga kiasi ambacho kila mwananchi atatakiwa kuchangia.”Alisema Kaunga

Alisisitiza kuwa ili mradi ukamilike wananchi watatakiwa kuchagua kamati ya ujenzi na wakumbuke kuchagua wajumbe waaminifu na waadilifu na kufungua akaunti ikiwa ni pamoja na kusoma mapato na matumizi ya mradi kila mwezi.

Kwa upande wake Mheshimiwa wa kata hiyo Abushehe Mbuva aliwaambia wananchi hao kuwa watakuwa pamoja katika kukamilisha mradi huo na kuahidi kumpeleka Mheshimiwa mbunge ili ajionee changamoto inayowakabili wananchi wake.