Wananchi wa Unyawi wapongezwa kujitolea shughuli za maendeleo

Tarehe iliyowekwa: September 26th, 2019

Wananchi wa eneo la Unyawi katika kata ya Bolisa Halmashauri ya Mji Kondoa wamepongezwa kwa kujitolea katika shughuli za maendeleo ikiwemo kuchimba barabara na kuwezesha magari kufika eneo hilo jambo ambalo lilikuwa haliwezekani hapo awali.

Pongezi hizo zilitolewa na Mkurugenzi wa Halmashauri ya Mji Kondoa Msoleni Dakawa wakati wa mkutano na wananchi wa eneo hilo uliofanyika eneo la Unyawi hivi karibuni.

“Kwa kweli mnastahili pongezi za dhati mmetengeneza barabara wenyewe na hili limewezekana kwa kuwa mna umoja kati yenu na viongozi wenu kuanzia waheshimiwa madiwani na watendaji na naamini mtafanya makubwa zaidi na serikali ya awamu ya tano haitasita kuwaunga mkono katika juhudi zenu hizo,”alisema Mkurugenzi Dakawa.

Aliendelea kusisitiza kuwa eneo hilo lina tatizo la maji ila serikali imechimba visima maeneo ya jirani kinachosubiriwa ni kupatikana kwa fedha zitakazosaidia kusogeza miundombinu ya maji kwa ukaribu ikiwa ni pamoja na kusogeza umeme katika maeneo hayo kwani nguzo zimesogea hadi eneo la Bolisa na mradi unaendelea.

Hatahivyo aliwaahidi kumtuma Mhandisi ili kuangalia namna bora ya kuboresha barabara waliyochimba wananchi ili iweze kupitika wakati wote wa masika na kiangazi na kuwaomba kuwa na subira kwani serikali inathamini na kutambua mchango wao katika shughuli za maendeleo.

“Mwaka huu mwezi Novemba tarehe, 24 kuna uchaguzi wa Serikali za Mitaa niwaombe wananchi tujitokeze kwa wingi kujiandikisha katika eneo letu ili tuweze kupiga kura na kuchagua viongozi wa mtaa wetu wapenda maendeleo na tuepukane na kuwachagua viongozi kwa kupewa rushwa au zawadi zozote,”alisisitiza Mkurugenzi Dakawa.

Akiongea katika mkutano huo diwani wa Viti Maalum tarafa ya Kolo Mhe. Ramla Abeid aliwashukuru wananchi kwa kujitoa kwao na kuwasihi kuchangia ukarabati wa Shule ya Msingi Bolisa kwani maendeleo wanayoyafanya ni kwa ajili ya mafanikio yao wenyewe.