"Wananchi wahamasishwe kujitolea nguvu kazi"- Mhe. Kiberenge

Tarehe iliyowekwa: October 28th, 2021

Na. Leah Joseph

Mwenyekiti wa Halmashauri ya Mji Kondoa Mhe.Abdi Kiberenge amewashauri Viongozi wanaosimamia miradi ya maendeleo kuendelea kuwashawishi wananchi kujitolea nguvu kazi ili kufikia malengo.

Kauli hiyo ameitoa wakati wa mkutano wa baraza la wazi la waheshimiwa madiwani  la kupokea taarifa kutoka kamati za kudumu za Halmshauri uliofanyika katika ukumbi wa Halmashauri ya Mji Kondoa hivi karibuni.

"Halmashauri imeendelea kupokea fedha kwa ajili ya kutekeleza miradi ya maendeleo ambapo miradi iliyokuwa ikitekelezwa katika Shule za Msingi Bolisa, Ubembeni, Iboni,Shule ya Sekondari Kwapakacha na Bicha imekamilika na inaendelea kutoa huduma zilizokusudiwa hivyo basi ili kufikia hatua kama hiyo ni lazima wananchi washirikishwe toka mwanzo mwa miradi,"amesema Mhe. Kiberenge.

Mhe.Mwenyekiti ameendelea kwa kuwapongeza  wale wote waliosimamia miradi yao vizuri kwa kuhamasisha wananchi kuchangia nguvu kazi ikiwemo Shule ya Msingi Ubembeni na Shule ya Sekondari Ula na kusema wanastahili pongezi kwa kazi nzuri waliyoifanya.

Halikadhalika kwa upande wake Mkurugenzi wa Halmashauri ya Mji Kondoa Paul Sweya amesema kuwa jukumu la Halmashauri ni kutoa huduma bora na kwa wakati kwa wananchi wa Kondoa Mji kwa kuzingatia sheria, kanuni na miongozo mbalimbali ya Serikali.

Mkurugenzi ameendelea kwa kusema kuwa katika kutekeleza majukumu hayo yote inahitajika nguvu ya pamoja katika usimamizi na ufuatiliaji wa miradi ya maendeleo katika hatua zote za utekelezaji kwa kushirikiana na timu nzima ya wataalam ambapo kwa sasa kila  Mkuu wa Idara amepewa Kata ya kufuatilia kwa karibu na kutoa taarifa za shughuli zote za maendeleo zinazoendelea katika kata husika.

Hata hivyo akiongea awali Mkuu wa Wilaya ya Kondoa Mhe.Hamisi Mkanachi  amewashukuru wote wanaoendelea  kupokea chanjo ya UVIKO 19 na kuwasihi wengine ambao bado kufanya hivyo kwa usalama wa afya zao na za wengine.

Naye Mratibu wa Elimu ya Afya kwa umma Mkoa wa Dodoma Dkt Nassoro Ally Matuzya amesema kuwa Halmashauri ya Mji Kondoa imefanya vizuri sana katika zoezi la chanjo awamu ya kwanza lakini kwa awamu ya pili bado idadi hairidhishi kwa watu wanaochanja.

"Nashindwa kuelewa tunakwama wapi maana Rais wetu Samia Suluhu Hassan pamoja na kuleta chanjo tena kwa gharama kubwa  bado ana nia ya dhati ya kulinda afya za wananchi wake kwani ameongeza fedha katika  miradi ya ujenzi wa vyumba vya madarasa ili kupunguza msongamano", ameongeza Dkt Nassoro.

Naye Mwenyekiti wa Chama cha Mapinduzi Wilaya ya Kondoa Mohamed Kova amewasihi viongozi ,wananchi pamoja na watumishi wote bila kujali nafasi zao kudumisha umoja na mshikamano ili kuweza kufanikisha shughuli za maendeleo kwani utengano huleta mpasuko na mgawanyiko hivyo ni vyema wakazika tofauti zao binafsi mahala pa kazi na kuhudumia wananchi.

Mkutano wa baraza la waheshimiwa madiwani wa kupokea taarifa kutoka kamati za kudumu za Halmashauri robo ya kwanza umefanyika na  umehudhuriwa na Mkuu Wilaya,Waheshimiwa madiwani,Kamati ya ulinzi na usalama, Wakuu wa Idara na vitengo, wawakilishi kutoka taasisi za Serikali pamoja na wananchi.