Wananchi Waomba Huduma ya Umeme

Tarehe iliyowekwa: August 18th, 2018

Wananchi wa mitaa ya Bolisa, Ukunku na Mulua wamemuomba mbunge wa Kondoa Mjini kuwasaidia kupata huduma ya umeme katika mitaa yao ambayo imepitiwa na nguzo za umeme wa REA  ili waweze kuboresha maisha yao.

Maombi hayo waliyatoa katika mikutano ya hadhara iliyofanyika katika mitaa hiyo wakati wa ziara ya ukaguzi wa miradi na kuelezea utekelezaji wa Ilani ya Chama cha Mapinduzi iliyofanywa na Mbunge wa Kondoa Mjini Mhe. Edwin Sannda hivi karibuni.

“Mheshimiwa mbunge umeme huku kwetu lini utafika tunaona tu nguzo zimepita na nyaya zake nai umeishia katika mitaa ya jirani tusaidie tupate umeme ili tuanzishe viwanda vidogo vidogo na kuunga mkono juhudi za serikali na kujiongezea kipato? Aliuliza Bwana Mohamed mkazi wa Bolisa

Aidha ombi hili lilikaziwa na wakazi wa Mtaa wa Mlua ambapo walisema ni kipindi kirefu wamekaa bila ya kuwa na umeme na wamechoka kwasasa wanaomba wapate huduma ya umeme.

Akijibu maombi hayo kwa nyakati na meneo tofauti mbunge wa Kondoa Mjini Mheshimiwa Edwin Sannda alisema kuwa serikali imepanga kuhakikisha wananchi wote wanapata huduma ya umeme na mkandarasi wa kusambaza umeme mitaa ya Kondoa amepatikana kinachosubiriwa ni kuanza kazi baada ya kumaliza Chamwino na Bahi.

“Serikali imeendelea kutenga fedha kwa ajili ya kutoa huduma hii na ndio maana inafanya kwa awamu ambapo awamu ya kwanza kuna maeneo yalipata huduma mengine hayakumalizika ikaanza awamu ya pili ambayo ilikamilisha sehemu iliyobakia awamu ya kwanza na kuanzisha miradi mipya na sasa tuna REA awamu ya tatu ambapo inakuja kukamilisha miradi iliyobakia awamu ya pili na kuanzisha maeneo mengine na mitaa yetu ipo humo tuwe na subira tu.”Alisema Sannda

Alidha aliwasihi wananchi kuendelea kutunza vigingi vilivyowekwa na shirika la umeme kama alama za kuweka nguzo kwani maeneo mengine wananchi wamekuwa wakiviharibu na kuwapa kazi wakandarasi wanapoanza kazi na kuwataka kuendelea kufanya maandalizi ya kusuka nyaya za umeme na fedha za kulipia huduma ya kuingiza umeme katika nyumba zao.

Ziara ya mbunge imefanyika katika kata zote nane za Halmashauri ya Mji Kondoa ambapo miradi mbalimbali ilikaguliwa na kufanya mikutano ya hadhara ambapo wananchi walipata fursa ya kuuliza maswali ya utekelezaji wa Ilani ya CCM kwa kipindi cha miaka miwili na aliongozana na uongozi wa Chama Cha Mapinduzi Wilaya ya Kondoa na wataalam kutoa halmashauri ya Mji Kondoa.