Wanawake Kondoa Mji watoa Bima za Afya kwa watoto yatima

Tarehe iliyowekwa: March 5th, 2024

Wanawake wa Halmashauri ya Mji Kondoa wametoa kadi 154 za bima ya afya iliyoboreshwa kwa watoto na wazee wanaoishi katika vituo vya kulelea watoto hao vya Mtakatibu Gema na Bicha.

Kadi hizo zimetolewa na Ndg. Christina Kalekezi Katibu Tawala Wilaya ya Kondoa kwa niaba ya Mkuu wa Mkoa wa Dodoma Mhe. Rosemary Senyamule katika vituo hivyo akiwa ameambatana na wanawake wa Kondoa waliochangia kuwezesha kupatikana kwa kadi hizo.

“Huu ni utu na ukishakuwa na utu utafahamu kwamba kuna mahitaji mbalimbali ya watoto sisi akina mama ndi tunaojenga taifa ukiona taifa imara lenye viongozi imara kama Dkt. Samia Suluhu Hassan ukimuona namna alivyo na diplomasia na utu na anavyojitahidi kuhakikisha Tanzania iko salama yule mama aliyemlea anapaswa apewe maua yake,”amesema Katibu Tawala

Aidha amesema amevutiwa na utu walioonesha wanawake hao baada ya kuona wameguswa na watoto wanaoishi katika vituo hivyo ambao wanaonekana hawana wazazi lakini wao ndio wazazi wao ka kuwa wamekuwa wakifika mara kwa mara kituoni hapo na kutoa mahitaji mbalimbali ya watoto lakini wameguswa zaidi kwa kuona suala la afya ndilo la msingi.

“Nyie wakina mama mmenishangaza sana kwamba mnapokuwepo hapa afya zinateteleka wengine wanakimbia kwenye baridi wanapata shida mkaona wanavyopata shida wanapataje dawa hawa walezi waliojitolea niwashukuru na niwapongeze kwa kuwa mnaisaidia Serikali ya Jamhuri ya Muungano ya Tanzania,”amesisitiza Katibu Tawala

Ameongeza kwa kuwapongeza kwaniaba ya serikali na kusema kuwa sasa ndio kwanza wameanza kwa kutoa bima za afya hivyo waendelee kuwalea watoto ili wakue katika misingi na kuwa kama wanawake viongozi kwa kuwa kwasasa kumekuwa na mmomonyoko wa maadili ikiwemo kujiingiza katika vitendo visivyo na maadili.

Akishukuru kwa niaba ya wazee na watoto wa kituoni cha Gema Sista Jane Fransisca amesema anawashukuru wanawake wa Kondoa kwa upendo, umoja  na ushirikiano wao kwa kuwaletea vyote walivyoviandaa ikiwa ni pamoja na bima za afya na kuwaomba kuendelea kuwatembelea katika kituo hicho.

Wanawake wa Kondoa kwa kushirikiana na Halmashauri wametoa michango yao zaidi ya shilingi laki 7 na kutoa bima za afya kwa watoto 154 wa kituo cha kulelea watoto yatima cha Gema na Bicha Islamic ikiwa ni sehemu ya maadhimisho ya siku ya Wanawake Duniani Machi 8 itakayofanyika kimkoa wilayani Chamwino na kaulimbiu ya mwaka huu inasema “Wekeza kwa Wanawake kuharakisha Maendeleo ya Taifa na Ustawi wa Jamii.”