"Wanawake ni jeshi kubwa lenye silaha zote"- DC Nyangasa

Tarehe iliyowekwa: March 5th, 2025

Wanawake wametakiwa kutambua kuwa wao ni jeshi kubwa na lenye silaha zote hivyo wajiamini kusaidiana, kuinuana na kuungana mkono ili kufikia malengo wanayojiwekea.

Hayo yamesemwa na Mkuu wa Wilaya ya Kondoa Mhe. Fatma Nyangasa wakati akiongea na wanawake  wa Kondoa Mji wakati wa maadhimisho ya siku ya Wanawake katika Halmashauri ya Mji Kondoa katika Ukumbi wa Kondoa Irangi.

"Tuwe na roho ya kuombeana mema sababu tabia ya kuona mwanamke mwenzako amefanikiwa unakasirika ni tabia yako binafsi wewe kwani sisi kama wanawake tuna kila sababu ya kuishi pamoja na hakuna kinachoshindikana"amesema Mhe. Nyangasa

Aidha amesema yupo tayari kwa ajili ya kuwasaidia wanawake wa Kondoa lakini amewasihi wawe tayari na kuridhika na maamuzi yatakayotolewa wanapoleta jambo kwake kwa kuwa jambo lolote lina  majibu ya aina mbili.

Ameongeza kwa kuwasihi wanawake kuendelea kumuombea Rais Mhe. Dkt. Samia Suluhu Hassan kwa kuwa ameleta miradi ya kutosha Kondoa katika nyanja zote muhimu ikiwemo afya, elimu na barabara.

"Ameleta fedha tunajenga shule ya amali Kingale, shule mpya 16, zahanati na ukarabati mkubwa wa hospitali ya Mji ukiacha miradi ya kimkakati ya kitaifa kama reli ya SGR sasa tumlipe kwa kufanya kazi na shughuli za kiuchumi"amesisitiza Mhe. Nyangasa

Ameendelea kwa kuwataka kuwaunga mkono waheshimiwa madiwani wanawake ikiwa ni pamoja na kuwashawishi vijana kushiriki katika uchaguzi mkuu utakaofanyika Oktoba 2025.

Naye Mwenyekiti wa CCM Wilaya ya Kondoa Mhe. Hija Suru amewataka wanawake kusimama imara kwa kuwa wanaweza wakipewa nafasi kwa kuwa wanajiamini na kukisimamia wanachokiamini.

"Wanawake tujitoe kama wanavyojitoa kikundi cha Wanawake na Samia na nawaombs tuongeze upendo nisemee ninaposemwa mimi vibaya kama sipo na tusemeane mema" amesisitiza Mhe. Suru

Sherehe za maadhimisho ya Siku ya Wanawake Duniani Halmashauri ya Mji Kondoa zimepambwa kwa maandamano na kugawa mahitaji kwa vituo vitatu vya kulelea watoto Kondoa.