Wanufaika mikopo ya Halmashauri wapewa mafunzo

Tarehe iliyowekwa: November 3rd, 2022

Wanufaika wa mikopo itokanayo na asilimia kumi ya mapato ya Halmashauri ya Mji Kondoa wamepatiwa mafunzo ya namna ya kufanya biashara zao ili mikopo waliyopatiwa iwe na tija na kuwainua kiuchumi.

Mafunzo hayo yamefanyika katika ukumbi wa mikutano wa Halmashauri ya Mji Kondoa na kuhudhuriwa na wanavikundi waliopata mkopo kwa robo ya kwanza, Idara ya Maendeleo ya Jamii na wawakilishi wa Kitengo cha Sheria.

Akitoa mada katika mafunzo hayo Afisa Maendeleo ya Jamii kata ya Kondoa Mjini Ndg. Paschal Materu amewaambia wanufaika hao kuwa wabunifu katika biashara zao wanazofanya ili kujiongezea soko na kuacha kufanya kazi kimazoea hali itayowapelekea kukimbiwa na wateja wao na kujiona biashara wanayofanya haina tija kwao na kushindwa kufanya marejesho ikiwa ni pamoja na kuendelea kudidimia kiuchumi.

“Lazima unapofanya kazi zako ujiwekee malengo na ujiamini na huwezi kujiamini kama unatoa bidhaa mbovu ndio maana nimekuambia wale washindani wako unatakiwa uangalie wapi wanapofeli wewe ndio unaboresha wote tunashona nguo lakini ushonaji wangu na wako unatakiwa utofautiane hata kama mnauza bei moja wa kwako ukiwa bora lazima watu watakuja kwako hata kama utaongeza bei.”amesema Ngd. Paschal

Aidha amewataka kuwa na uhitaji wa mafanikio kutokana na wanachofanya na kile wanachotamani kufikia siku zijazo kutokana na faida anayoipata ikiwa ni pamoja na kwa tayari kuibeba hasara kwani kwa kuogopa kubeba hasara hawawezi kuwa wajasiriamali wazuri hivyo wawe wanaweka akiba kwa ajili ya kuitumia inapotokea hasara.

 Kwa upande wake Kaimu Mkuu wa Idara ya Maendeleo ya jamii Ndg. Latipha Koshuma amewataka wanavikundi hao kuwa makini wakati wa ununuzi wa mashine walizoomba kununua kwa kuepuka kununua vitu mtandaoni kwani kwa kufanya hivyo wanaweza kupoteza fedha kwa kuwalipa watu wasiowajua na kukosa mashine.

“Mnatakiwa kuchagua watu wawili kwa ajili yakwenda Dodoma au Dar kulingana na mashine mnazotaka nendeni moja kwa moja dukani mkaombe profoma na invoice halafu mrudi kuwaonyesha wanakikundi wengine na awape akaunti namba ya benki mfanye malipo halafu awatumie mashine zetu msifanye vitu ndani ya box yaani online itawapotezea muda na mnatakiwa kuwa makini,”amesema Ndg. Latipha.

Hata hivyo amewataka wanavikundi kuwa waaminifu wakati wa marejesho ukifika kwa kuleta fedha kwa wakati na kiwango kilichopo kwenye mkataba ili fedha hizo zitumike kuwakopesha wengine wenye mahitaji na kabla hawajarejesha wanapaswa kufika katika ofisi za Maendeleo ya Jamii kwa ajili ya kupewa kumbukumbu namba ya malipo na wanaopaswa kurejesha ni wanakikundi wenyewe si mtu mwingine.

Mmoja wa wanakikundi Ndg. Hadija Ntisi ameishukuru Halmashauri ya Mji kwa kuwapatia mkopo kwa kuwa ni mara ya pili anapata mkopo ambao umekuwa ni msaada mkubwa kwake na familia yake na kwasasa amiliki kibanda cha kuuza vitu vidogo vidogo  ambapo fedha anazozipata zinamsaidia kujikimu yeye na familia ya kwa ujumla

Jumla ya viwili vimepatiwa mkopo ambapo kimoja ni cha wanawake na kimoja cha vijana na mtu mwenye ulemavu mmoja wamepatiwa mkopo katika robo ya kwanza mwaka wa fedha 2022/2023 na shilingi milioni 11 zimetolewa na wamepewa mafunzo ya kuwajengea uwezo kwa kuwafundisha mada mbalimbali ikiwemo ujasiriamali na bisahara, mitaji na mikopo, utunzaji wa kumbukumbu ikiwa ni pamoja na kuwasainisha mikataba kati yao na Halmashauri.