Wasimamizi wa vituo vya kupigia kura wafundwa

Tarehe iliyowekwa: October 25th, 2020

Msimamizi wa Uchaguzi jimbo la Kondoa Mjini Msoleni Dakawa amewataka wasimamizi wa vituo na wasimamizi wasaidizi wa vituo vya kupigia kura wakati wa uchaguzi mkuu kuzingatia maelekezo watakayopewa ili kuuvusha salama uchaguzi jimbo la Kondoa Mjini.

Kauli hiyo ameitoa wakati akifungua semina ya siku mbili ya wasimamizi hao inayofanyika katika ukumbi wa Chuo Cha Ualimu Bustani Kondoa Mjini.

"Kila mtu anajua kwanini ameteuliwa na mkumbuke mlioomba mlikuwa wengi ila nyie wachache mmeaminiwa kuwa mtalivusha salama taifa katika zoezi linalokuja mbele yenu na mjue kwasasa macho na masikio ya watu wote yapo majimboni msituangushe,"amesema Dakawa.

Aidha amewakumbusha kuwa uchaguzi upo wa mujibu wa sheria, kanuni, taratibu na miongozo mbalimbali hivyo wakavizingatie kwani kwenda kinyume na hivyo watawajibika kwa mujibu wa sheria jambo ambalo si zuri kwao.

"Sitarajii kukutana na migogoro na mitafaruku kwenye vituo vya kupigia kura zaidi mkashirikiane kama timu moja kwani kila mmoja katika kituo ana majukumu yake,"amesisitiza Dakawa

Hata hivyo amewasihi wasimamizi hao kuepuka kuleta itikadi za vyama vyao kwa kuwa wameshakula kiapo cha kujitoa uanachama na wakumbuke kuwa wapo pale kama watumishi wa tume na serikali na si wanasiasa.

"Mkazingatie muda wa kufika kituoni, kituo kinafunguliwa saa 1:00 asubuhi na si muda wa wewe kufika kituoni na ujue kuchelewa kwako ni kuwakwamisha wananchi, na kubwa mkamtangulize Mungu katika kazi hii ili mmalize salama," amesema Dakawa

Akiongea kwa niaba ya wasimamizi wengine  Zainabu Shabani amewasihi washiriki wengine kwenda kuwa waaminifu katika kukamilisha zoezi hilo ili likamilike kwa amani na utulivu.

Semina hii imehudhuriwa na wasimamizi na wasimamizi wasaidizi zaidi ya mia 300 wa vituo vya kupigia kura jimbo la Kondoa Mjini na inafanyika kwa siku mbili ambapo imehudhuriwa pia na wasimamizi ngazi ya jimbo na kata.