Wasimamizi Wasaidizi wa Uchaguzi ngazi ya Kata Jimbo la Kondoa Mjini wapatiwa mafunzo

Tarehe iliyowekwa: August 4th, 2025

Wasimamizi Wasaidizi wa Uchaguzi ngazi ya Kata jimbo la Kondoa Mjini wameanza kupatiwa mafunzo ya siku tatu kwa ajili ya kuanza shughuli za Uchaguzi Mkuu wa mwaka 2025.

Akifungua mafunzo hayo Msimamizi wa Uchaguzi Jimbo la Kondoa Mjini Ndg. Sekela Mwasubila amewaasa washiriki wa mafunzo hayo kusoma Katiba, Sheria, kanuni, miongozo mbalimbali pamoja na maelekezo yatakayotolewa na Tume.

"Fanyeni utambuzi wa vituo vya kupigia kura mapema Ili kubaini mahitaji maalumu ya vituo husika na kuhakikisha kunakuwa na mpangilio mzuri ambao utaruhusu uchaguzi kufanyika kwa utulivu na amani" amesema Mwasubila.

Mafunzo hayo yamejumuisha washiriki 16 kutoka Kata 8 za Halmashauri ya Mji Kondoa ambapo jumla ya mada 10 zitawasilishwa na wasimamizi hao watapata fursa ya kubadilishana uzoefu na kujadiliana namna ya kufanikisha uchaguzi mkuu wa mwaka 2025 kwa kuangalia namna wanavyoweza kukabiliana na changamoto mbalimbali zinazoweza kujitokeza katika hatua zote za uchaguzi.

Hata hivyo amewasisitiza wasimamizi wasaidizi hao kufanya mawasiliano na msimamizi wa Uchaguzi au Afisa Uchaguzi pale ambapo ushauri utahitajika kuhusiana na masuala ya Uchaguzi.

Aidha Wasimamizi Wasaidizi hao wamekula kiapo cha kutunza siri na kutoa tamko la kujitoa uanachama wa chama cha siasa kabla ya kuanza mafunzo.

Uchaguzi mkuu wa Rais, wabunge na Madiwan unatarajiwa kufanyika tarehe 29 Oktoba, 2025 ambapo zaidi ya watu milioni 30 waliojiandikisha  wanatarajiwa kupiga kura siku hiyo.