Watendaji watakiwa kuwasaidia walengwa wa TASAF kupata stahiki zao

Tarehe iliyowekwa: May 20th, 2024

Mkurugenzi wa Halmashauri ya Mji Kondoa Ndg. Said Majaliwa amewataka Watendaji wa Kata na Mitaa kuwasaidia walengwa wa TASAF kupata stahiki zao wanazolipwa kila mwezi kwa kuwatafuta popote walipo.

Ameyasema hayo wakati wa kikao cha pamoja na walengwa wa TASAF wa mtaa wa Miningani alichoitisha kwaajili ya kusikiliza changamoto za walengwa hao kilichofanyika katika Ofisi ya Mtaa wa Miningani.

“Nawaomba wataalamu wangu hasa watendaji siku ya kugawa fedha umia kuwa kwanini huyu mtu wangu hajapata fedha isiwe kirahisi kumtoa mtu, si ndio Mtendaji hawa ni watu wako sababu leo mtu wako kalipwa dirisha lingine hayupo usitulie nipigie simu kujua sababu za kutoonekana kwa jina lake siyo kwenye vikao kama hivi.”amesema Mkurugenzi Majaliwa

Aidha amewataka kuwafikia walengwa ambao hawafiki wakati wa mgao kwa kuwa wakati mwingine mlengwa anashindwa kufika kutokana na kukosa nauli au kuwa mgonjwa na si kurudisha fedha zake kwa kuwa lengo la Rais Dkt. Samia Suluhu Hassani ni kuhakikisha walengwa wote wanapata fedha hizo ili kuwasaidia katika kutatua changamoto zao.

Ameendelea kuwahakikishia kuwa hakuna fedha ambazo zimeliwa na watendaji ila ni kukosekana kwa mawasiliano na elimu kabla ya kugawa fedha na kuwahakikishia walengwa wote wa Mtaa wa Miningani waliofanya kazi na kustahili kulipwa fedha kuwa watalipwa fedha zote kwa siku walizofanya kazi.

Hata hivyo amewataka waratibu wa TASAF kuhakikisha wanaitumia siku yote ya Jumanne kwa kufika katika Mtaa wa Miningani na kuwasikiliza walengwa wote wenye changamoto na kuhakikisha wanazitatua na kwa walengwa ambao changamoto zao hazijatatuliwa wafike katika ofisi yake au kumpigia simu ili kuzitatua.

Ametumia fursa hiyo kuwakumbusha walengwa kuwa mwaka huu ni wa uchaguzi wa serikali za mitaa na maboresho ya daftari la wapiga kura hivyo wajiandae kuboresha taarifa zao ili waweze kuchagua viongozi watakaosaidia kutatua kero zao.

Kwa upande wake Mwenyekiti wa Mtaa wa Miningani Mhe. Ibrahimu Hamisi amemshukuru Mkurugenzi kwa kufika na kuwasikiliza walengwa hao ambao walikuwa na sintofahamu kutokana na kufanya kazi bila kupewa malipo yao.

Mkurugenzi ameeitisha kikao hicho kutokana na kupokea malalamiko kutoka kwa walengwa hao baada ya malipo ya dirisha la mwezi Januari na Februali ambapo baadhi yao hawajapata fedha ikiwa ni sehemu ya kutekeleza kauli ya mkoa wa Dodoma ya Kero yako, Wajibu wangu.