Watumishi Idara ya Afya Wamshukuru Mbunge kwa Ukarabati

Tarehe iliyowekwa: May 25th, 2019

Watumishi wa Idara ya Afya Hospitali ya Mji Kondoa wamemshukuru mbunge wa Kondoa Mjini Edwin Sannda kwa kuwasaidia ukarabati wa jengo la kupokelea wagonjwa hali itakayowapa hali ya kuendelea kufanyakazi kwa bidii.

Shukrani hizo zimetolewa na Kaimu Mganga Mfawidhi Hospitali hiyo Daktari Ramadhan Wambangulu alipokuwa akisoma taarifa ya ukarabati wa jengo la kupokelea wagonjwa lililofanyiwa ukarabati hivi karibuni.

“Mheshimiwa mbunge ukarabati wa jengo hili umesaidia eneo kuwa kubwa kwa wananchi kupata huduma jambo linalotupa nguvu kwamba ile safari yetu ya ukarabati wa hospitali inaanza rasmi.”Alisema Daktari Ramadhan.

Aliongeza kuwa ukarabati huo umesaidia pia kuondoa msongamano wakati wa kusubiria kupata huduma kwani wagonjwa wote watakuwa katika utaratibu mzuri tofauti na awali.

Hata hivyo aliongeza kuwa hospitali inakabiliwa na changamoto mbalimbali ikiwemo uchakavu wa miundombinu ya maji, upungufu wa watumishi na uchakavu wa jengo la kuhifadhia maiti.

Akiongea baada ya ufunguzi Mbunge wa Kondoa Mjini Edwin Sannda aliwapongeza watumishi wa Idara ya Afya kwa kazi kubwa wanayoifanya ya kuhudumia wananchi wa Kondoa na maeneo ya jirani.

“Niwapongeze hospitali kwa kusimamia ukarabati huu hadi umekamilika kwani unaweza ukatoa fedha na zisitumike inavyotakiwa lakini nyie mmesimamia vizuri fedha za serikali hatimaye wananchi wa Kondoa na maeneo mengine watakuja kupata huduma sehemu iliyotulia.”Alisema Mhe. Sannda.

Ukarabati wa jengo la kupokelea wagonjwa hospitali ya Mji Kondoa umegharimu kiasi cha shilingi milioni nane fedha zilizotolewa na mfuko wa jimbo, EGPAF na mapato ya ndani ya hospitali.