"Watumishi mkawe mabalozi wa kupanda miti" - Mwalimu Mtamba

Tarehe iliyowekwa: April 1st, 2020

Wakuu wa Idara na watumishi wa Halmashauri ya Mji Kondoa wametakiwa kuwa mabalozi wa upandaji miti katika maeneo wanayoishi ili jamii ihamasike kupanda miti katika maeneo yao.

Hayo yalisemwa na Kaimu Mkurugenzi wa Halmashauri ya Mji wa Kondoa Mwalimu Hassan Mtamba wakati wa zoezi la upandaji miti lililofanyika katika Mahakama ya Wilaya ya Kondoa ikiwa ni kuadhimisha kilele cha siku ya upandaji miti duniani.

“Katika kutimiza lengo la Kitaifa Halmashauri ya Mji Kondoa imepanda miti 30 katika viunga vya Mahakama ya wilaya leo lakini katika shule zetu tumepanda miti laki moja na kandokando ya barabara kuanzia eneo la Magereza hadi Bicha tumepanda miti mia tatu na bado zoezi ni endelevu hadi tufikie lengo la kupanda miti milioni moja na laki tano,”alisema Mwalimu Mtamba

Aidha aliwashukuru watumishi wote waliojitokeza katika zoezi hilo na kuwasihi kuendelea kuwa wazalendo kwa kupanda miti pia katika maeneo mbalimbali yaliyotengwa kwa ajili ya upandaji mit ikatika Halmashauri ya Mji kwaajili ya vizazi vya sasa na baadae.

“Tumeshapanda miti lakini nawasihi wote tuendelee kutekeleza majukumu yetu na kulijenga taifa bila kusahau kuchukua tahadhali ya kujilinda na ugonjwa wa Corona,”alisisitiza Mwalimu Mtamba.

Kwa upande wake Afisa Tawala wa Mahakama ya Wilaya ya Kondoa Bi Edna Edward alitoa shukrani zake za dhati kwa watumishi wa Halmshauri ya Mji Kondoa kwa kufanikisha upandaji wa miti katika Mahakama hiyo na kuwahakikishia kuwa wataitunza  kwa hali na mali.

Kila tarehe mosi ya mwezi Aprili ya kila mwaka dunia huadhimisha siku ya upandaji miti ambapo Halmashauri ya Mji Kondoa imeadhimisha kwa kupanda miti katika Mahakama ya Wilaya ya Kondoa na kupanda miti 30 na kuifanya halmashauri kupanda miti zaidi ya laki tano.