Watumishi wa makao makuu Kondoa Mji wajengewa uwezo mifumo ya kiutumishi

Tarehe iliyowekwa: May 23rd, 2024

Zaidi ya watumishi 100 kutoka makao makuu, Wakuu wa Shule, Walimu Wakuu na Watendaji wa Kata na Mitaa wamejengewa uwezo wa mifumo mbalimbali ya kiutumishi na kushauriwa kubadili mtazamo kwa kukubaliana na matumizi ya kidigitali katika shughuli za kiserikali.

Hayo yamesemwa na Afisa Utumishi Ndg. Tecla Gasembe wakati akiongea na watumishi hao wakati wa mafunzo ya siku moja ya mfumo wa likizo, uhamisho na ufuatiliaji wa mfumo wa PEPMIS yaliyofanyika katika ukumbi wa mikutano wa Halmashauri ya Mji Kondoa.

“Tumeamua kubadilika kwasasa mambo mengi yatafanyika kwenye mifumo nawaomba tukubaline na mabadiliko hayokwani kwa vyovyote iwavyo lazima wote twende huko kwenye matumizi ya mifumo na sisi hatutawaacha tutatoa msaada kila wakati ili kuhakikisha jambo hili linafanikiwa bila vikwazo,”amesema Ndg. Tecla

Aidha amewasihi watumishi kutumia mfumo wa PEPMIS kwa kujaza kazi zao wanazofanya kila siku ili kupima utendaji wao kwa kuwa pia ni takwa la kisheria na limekuja badala ya Opras zilizokuwa zikijazwa awali.

“Sheria ya Utumishi wa umma sura ya 298 na kanuni zake limeelezea kwa uzuri jambo hili kama hamuijui mkiingia katika tovuti ya utumishi mtaipata lakini pia katika ofisi yenu ya Utumishi mtaipata hivyo tusilipuuze na lina athari kwetu kama watumishi na viongozi wetu lisipotekelezwa kwa umakini”amesisitiza Ndg. Tecla

Aidha watumishi walipitishwa katika mfumo wa Likizo, uhamisho na mkopo na Afisa Utumishi kutoka OR Utumishi Ndg. Catherine Massawe ambapo alisisitiza watumishi kutumia mifumo hiyo kwasasa kwa kuwa kila kitu kinafanyika huko.

Mafunzo hayo yamefanyika ikiwa ni mwendelezo wa serikali kuhamishia shughuli za kiutumishi katika mifumo jambo ambalo linaongeza uwazi na uwajibikaji kwa watumishi wa serikali na kuokoa muda ambao watumishi walikuwa wakiutumia kufuatilia mambo hayo na kauli mbiu inasema “Tuujenge Utumishi wa Umma wa Kidigitali”