Watumishi watakiwa kuendelea kutoa elimu ya stakabadhi ghalani

Tarehe iliyowekwa: June 23rd, 2025

Watumishi wa Idara ya Kilimo, Mifugo na Ushirika wametakiwa kuendelea kutoa elimu ya masuala ya stakabadhi ghalani ili wakulima waone manufaa ya kuuza mazao yao kwa kutumia mfumo huo badala ya njia inayotumika ya kuuza nje ya mfumo.

Hayo yamesemwa na Kaimu Mwenyekiti wa Baraza la biashara Ndg. Ally Mbena wakati wa kikao hicho kilichofanyika katika Ukumbi wa Mikutano wa Halmashauri ya Mji Kondoa.

"Wakulima wetu wanakosa elimu tu ya faida za mfumo wa stakabadhi ghalani lakini tusichoke kuendelea kuwapa elimu wakulima wetu naamini wataelewa nia njema ya Serikali ya wao kutumia mfumo huo"amesema Ally

Aidha amewaahidi wafanyabiashara walioshiriki kikao hicho kuwa mapungufu yaliyojitokeza mwaka jana katika mfumo wa stakabadhi ghalani hayatajirudia kwa kuwa yameshafanyiwa kazi.

Akiongea kwa upande wake Mkuu wa Idara ya Kilimo na  Mifugo Ndg. Hassan Kiseto amewataka wakulima kuhakikisha wote wanapeleka mazao yao kwenye maghala na ambao hawatafanya hivyo faini itatozwa.

Naye Afisa Biashara Halmashauri ya Mji Kondoa Ndg. Bertha Msaki amewahakikishia wafanyabiashara walioshiriki kuendelea kuboresha mazingira ya biashara zao ili kuhakikisha wanafanya biashara katika mzingira rafiki kwao.

Baraza la Bishara Wilaya ya Kondoa limefanyika ambapo limewakutanisha wafanyabiashara zaidi ya 30 kutoka makundi tofauti ambapo pia limehudhuriwa na Wakuu wa Idara wa Kondoa Mji na Vijijini, Meneja TRA Kondoa na Mameneja wa benki ya NMB, CRDB na TPB.

Halmashauri ya mji Kondoa leo imefanya Baraza la Biashara ambapo wadau mbalimbali wa biashara wamehudhuria Baraza Hilo wakiwemo wadau benki, TRA pamoja na wakuu wa Idara.