WAVIU waaswa kutumia fursa za mikopo ya Halmashauri

Tarehe iliyowekwa: October 18th, 2022

Watu Wanaoishi na Virusi vya UKIMWI (WAVIU) katika Halmashauri aya Mji Kondoa wameaswa kutumia fursa za mikopo isiyo na riba itokanayo na mapato ya Halmashauri ili kukuza mitaji yao na kujiinua kiuchumi.

Hayo yamesemwa na wajumbe wa Kamati ya Kudhibiti maambukizi ya UKIMWI wakati wa ziara ya kutembelea vikundi vya WAVIU katika kata ya  Chemchem iliyofanyika hivi karibuni.

“Mzingatie sana masomo mliyopewa kwenye VICOBA mkiyazingatia hata hii mikopo haitawapa shida kurejesha na sisi tunataka tuone matokeo ambapo hali zenu zinakwenda kubadilika na itafanya ambao hawakujiunga kwenye vikundi nao wajiunge na wabadilike,”amesema Mhe. Abushehe Mbuva mjumbe wa kamati.

Aidha amewataka wanavikundi hao kutambuana na kujenga mahusiano na vikundi vingine ikiwa ni pamoja na kutembeleana ili kubadilishana uzoefu kwani inawezekana wanachozalisha inaweza kuwa ni hitaji kwa vikundi vingine.

Kwa upande wake Mwenyekiti wa Kamati hiyo Mhe. Besela Maunga amewasihi wanavikundi hao kupendana na kufarijiana ili kuwavutia wengine ambao hawajajiunga na kuwataka kuachana na migogoro isiyo na tija.

“Hebu sisi tupendane tushirikiane na tutiane moyo tusivunjane moyo wenyewe kwa wenyewe tutachekwa isitokee sasa visasi vikaendelea hapana tumtangulize Mungu katika mambo yetu ili tuwe vizuri zaidi ,”amesisitiza Mhe. Besela

Wakiongea awali wawakilishi wa vikundi wameishukuru Halmashauri kwa kuendelea kuwajali na wamehaidi kujipanga tayari kwa kuchukua mikopo inayotolewa na Halmashauri kwa ajili ya kukuza mitaji yao na awali walishindwa kuchukua mikopo hiyo kwa kua waliogopa marejesho.

Wajumbe wa Kamati ya kudhibiti maambukizi ya UKIMWI imetembelea vikundi vitatu ambavyo ni Upendo, Changamoto na Fahisefa vinavyojishughulisha na ufugaji wa kuku, sungura na uzalishaji wa miche ya miti aidha waliongozana na Kaimu Mkurugenzi Annette Nara na Afisa Maendeleo ya Jamii Latipha Koshuma.