Wawezeshaji wa vikundi vya TASAF watakiwa kufundisha walengwa kwa tija

Tarehe iliyowekwa: April 22nd, 2024

Wawezeshaji wa vikundi vya kukopeshana na kukopa kwa walengwa wa TASAF kutoka Halmashauri ya Mji Kondoa na Halmashauri ya Wilaya ya Kondoa wametakiwa kwenda kufundisha walichojifunza kwa vikundi hivyo ili viwe na tija.

Hayo yamesemwa na Kaimu Mkurugenzi ya Halmashauri ya Mji Kondoa Ndg. Hassan Kiseto wakati akiongea na wawezeshaji hao katika mafunzo ya kuwajengea uwezo yaliyofanyika katika ukumbi wa mikutano wa Kondoa Irangi hivi karibuni.

“Cha msingi tu ni sisi wawezeshaji wa mpango huu ambao tunawapelekea wenzetu kule tubebe hii kam agenda ya msingi na tukifika kwenye maeneo ya walengwa tufikishe ujumbe mlioupata hapa na si kupata mafunzo na kwenda kukaa nayo au ukafanye kwasababu upo kwenye mpango,”amesema Kiseto

Ameongeza kuwa lipo tatizo la watu kufanya kazi kwa mazoea kwa kutofikisha alichotumwa kwa walengwa kama alivyopewa yeye ikiwa ni pamoja na kutofuatilia alichofundisha iwapo kinafanyiwa kazi tatizo ambalo lipo sehemu kubwa katika jamii ambapo wengi hufanya jambo sababu tu wametumwa kufanya.

“Nitoe wito kwetu sote kwamba ujisikie fahari kwamba nilifanikisha ujumbe niliotumwa kwenda kwa wananchi lakini pia matokeo ya ule ujumbe nauona mimi binafsi au hata mtu akienda kwenye vikundi alivyofundisha matokeo yanaonekana”amesisitiza Kiseto

Akiongea kwa upande wake Ndg. Anzanukye Mselela kutoka TASAF makao makuu amesema vikundi vilivyopo katika Halmashauri za wilaya ya Kondoa zinakwenda kufikiwa kwa asilimia 100 ambapo vikundi vyote yaani vilivyokuwepo kwenye mpango awali na vipya vitakavyoundwa vitapata mafunzo tofauti na wilaya zingine.

“Tutakwenda kuvihuisha vikundi vya awali yawezekana kuna vikundi tayari lakini tutakwenda kuhuisha kama kuna mtu ndani ya kikundi ambaye umri wake umesogea kidogo huyo tutamuacha ili tuwe na vikundi hai na mtu akija Kondoa tukisema kuna vikundi 50 tujue kweli vinazalisha.

Zaidi ya wawezeshaji  40 kutoka Halmashauri ya Mji Kondoa na Halmashauri ya Wilaya ya Kondoa wamepewa mafunzo na TASAF kwaajili ya kwenda kuvijengea uwezo vikundi vya kukopeshana na uzalishaji mali vya walengwa wa TASAF ili waweze kujikwamua kiuchumi.