Wazazi, Walimu na Wanafunzi Watakiwa Kushirikiana

Tarehe iliyowekwa: March 10th, 2019

Kaimu Mkurugenzi wa Halmashauri ya Mji Kondoa Kaunga Amani amewataka wazazi, walimu na wanafunzi wa Kondoa Mji kutimiza wajibu wao kila mmoja ili kuhakikisha kiwango cha ufaulu kinapanda katika shule za sekondari na kutimiza ndoto za wanafunzi  hapo baadae

Aliyasema hayo alipokuwa akiongeza katika kikao cha walimu, wanafunzi na wazazi kilichoombwa na wananchi wa Kondoa waishio ndani na nje ya Kondoa waliokuja kwa ajili ya kujadili changamoto za kielimu katika shule za sekondari za Bicha na Kolo.

“Wenzetu hawa wamekuja kuhamasisha suala zima la elimu na nimefurahi sababu walisema tuchague shule zenye changamoto za kielimu kwa kuanzia Halmashauri ya Mji ilikuwa ya tatu kimkoa matokeo ya kidato cha nne 2018 na ya 104 kitaifa hata hivyo Bicha Sekondari iliturudisha nyuma na kuwa ya mwisho kiwilaya.” Alisema Kaunga

Aidha aliongeza kuwa uwepo wa wazazi ni muhimu kwa kuwa watapokea moja kwa moja kile ambacho kitatolewa kwa kuwa wengi waliokuja katika jopo hili ni walimu hivyo itakuwa vyema kuwasikiliza na kuyachukua yale watakayoyasema na kwenda kuyafanyia kazi ili baada ya miaka kadhaa Kondoa iwe imevushwa kwa kiwango kikubwa kikubwa.

“Wazazi, walimu na wanafunzi kila mtu akiwajibika kwa nafasi yake hakuna linaloshindikana na hapo ndipo tunaposema utatu umekamilika kwani kila mtu akijipanga hakuna linaloshindika kwani mwanafunzi kazi yake kusoma, mwalimu kufundisha na mzazi kuhakikisha mwanafunzi anapata mahitaji muhimu.”Alisisitiza Kaunga

Akiongea kwa upande wake Mwenyekiti wa umoja huo wa wanakondoa Mwalimu Mukhsin alisema kuwa wanafunzi wa Kondoa wanaweza kufanya vizuri kwani hawana tofauti na wanafunzi wengine ndani ya mkoa na mazingira hayatofautiani ila kikubwa ni kuhakikisha kuwa kila mtu anatimiza wajibu wake.

“Tunapokuwa na matokeo mabaya huwa tunalaumiana ila si wakati wa kulaumiana ila tuyapokee matokeo hayo na baada ya kuyapokea tuangalie nini cha kufanya ili kusogea mbele kwa kufuta makosa ya nyuma ni imani yangu sehemu nne zikishirikiana tutasonga mbele ikiwemo serikali, wazazi, walimu na wanafuzi wenyewe wakiamua kusema matokeo mabaya basi inawezekana.” Alisema Mwalimu Mukhsin.

Umoja wa wanakondoa hao ni wazaliwa wa Kondoa ambao wanaishi ndani na nje ya Kondoa na wanafanya uhamasishaji wa masuala mbalimbali katika wilaya za Kondoa na Chemba ambapo kwasasa walikuja kusisitiza kuhusu masuala ya elimu na afya ikiwa ni pamoja na kutoa zawadi kwa wanafunzi waliofanya vizuri katika mitihani ya taifa kwa mwaka 2018.