Wazazi wanaochangia utoro waonywa

Tarehe iliyowekwa: October 17th, 2021

Mwenyekiti wa Halmashauri ya Mji Kondoa Mhe.Mohamed Kiberenge amewaonya wazazi wanaowakatisha masomo watoto wao kwa ajili ya kufanya shughuli zao binafsi na kuendekeza utoro rejareja.

Kauli hiyo ameitoa wakati wa ziara ya kutembelea na kukagua Maendeleo mradi wa ujenzi wa madarasa katika Shule ya Msingi Tunguf Kata ya Suruke hivi karibuni.

"Kuna baadhi ya watoto nimegundua hawafiki shule na wazazi wao hawachukuliwi hatua yeyote na nimemuuliza mwalimu  ameniambia amepeleka majina ya watoto watoro na  barua ya malalamiko katika Ofisi ya Mtendaji wa Mtaa hivyo muitishe baraza la kata ili hatua stahiki zichukuliwe dhidi ya wazazi na lifanyiwe kazi haraka,"amesema Mhe. Kiberenge.

Halikadhalika ameendelea kwa kusema kuwa kuna watoto wanaenda shuleni kwa hiyari na wengine wanaweza waje leo na kesho wasije wanabaki nyumbani wakichunga mifugo na kukata kuni ambapo jambo hilo ni la hatari sana na kuuagiza uongozi wa mtaa kuwachukulia wazazi wa wanafunzi watoro hatua kali za kisheria.

"Mzazi ambae hajatoa taarifa ya mtoto wake kwa siku mbili au tatu kuelezea kwa nini mtoto hafiki shule ni lazima mchukue hatua na msije  mkalichukulia kirahisi suala hili maana wanafunzi wanaoachwa wanakwenda kuwaharibu wanafunzi ambao wanakwenda shuleni," amesisitiza Mhe Kiberenge.

Hatahivyo Mhe. Kiberenge amesema kuwa ni lazima kuwe na muunganiko baina ya wazazi na waalimu kwa kutoa taarifa juu ya Maendeleo ya watoto shuleni ambapo aliagiza Maafisa Elimu kata kulisimamia jambo hilo kwani hakuna mjadala katika jambo la kukomesha utoro.

Mhe.kiberenge ametembelea mradi wa ujenzi wa vyumba viwili vya madarasa katika Shule ya Msingi Tungufu kwa lengo la kuhamasisha wananchi kuchangia maendeleo na katika kuwaunga mkono amechangia shilingi elfu hamsini pamoja na wataalam wengine alioongozana nao.