Wazee na Wasioona Kingale Wawezeshwa

Tarehe iliyowekwa: December 14th, 2018

Wazee na wasioona kata ya Kingale halmashauri ya Mji Kondoa wamewezeshwa kwa kupewa vitambulisho 1070 vya matibabu  bila malipo na fimbo 10 za kuwaongoza wasioona lengo likiwa ni kuboresha huduma za afya kwa watu hao wenye mahitaji maalum.

Akikabidhi vitambulisho hivyo na fimbo mkuu wa wilaya ya Kondoa Mhe. Sezaria Makota alisema kuwa serikali imeamua kugawa vitu hivyo kwa watu hao wenye mahitaji maalum ikiwa ni utekelezaji wa sera ya afya ambayo inamtaka kila mzee wa kuanzia miaka 60 anapatiwa kitambulisho ambacho kitamsaidia kupata huduma za matibabu bila malipo kwa nchi nzima.

“Jumla ya vitambulisho 1070 vitatolewa leo ambapo kata hii ndio kata yenye vitambulisho vingi katika kata zote za Halmshauri ya Mji wa Kondoa na namshukuru sana Mheshimiwa diwani ambaye amekuwa akihamasisha sana wananchi wake katika masuala ya maendeleo.”Alisisitiza Mhe. Makota

Aidha kwa upande wake diwani wa Kata ya Kingale Mhe. Abushehe Mbuva alisema kuwa wananchi wa kata yake wanafuraha kupata vitambulisho hivyo na mambo mengine mazuri yanayoendelea kwenda katika kata ya Kingale.

“Tumeandaa shughuli hii katika eneo hili kwa lengo maalum kabisa kwani ukiangalia tumezungukwa na majengo ya kituo cha Afya Kingale upatikanaji wa vitambulisho utasaidia sana wazee kupata huduma hapahapa na kuwaondolea adha ya kusafiri kwenda kufuata huduma ya afya kwa kweli tunaishukuru sana serikali”. Aliongeza Mhe. Mbuva

Zoezi la ugawaji wa vitambulisho vya Afya limefanyika katika kata ya Kingale ambapo Halmashauri imedhamiria kutoa vitambulisho vya Afya kwa wazee zaidi ya 5000 wa kata zote 8 na Mkuu wa Wilaya ya Kondoa Mhe. Sezaria Makota alitoa fimbo 10 kwa ajili ya kuwasaidia wasiiona.