Waziri Kairuki ampongeza mwekezaji Kondoa

Tarehe iliyowekwa: May 21st, 2020

Waziri wa Nchi Ofisi ya Waziri Mkuu Uwekezaji Mhe. Angellah Kairuki amempongeza Bwana Muhammad Mavere mwekezaji wa kiwanda cha mafuta ya alizeti kilichopo katika Halmashauri ya Mji Kondoa kwa kukumbuka kurudi nyumbani na kufanya uwekezaji mkubwa hali itakayowapa moyo wawekezaji wengine kuja kuwekeza Kondoa.

Pongezi hizo amezitoa wakati wa ziara yake katika kiwanda cha Magin LTD aliyoifanya hivi karibuni kwa ajili ya kuona kazi zinazofanyika na kujua changamoto anazokabiliana nazo ikiwa ni ahadi aliyoitoa wakati wa kongamano la uwekezaji lililofanyika mkoani Dodoma mwaka jana.

“Niwapongeze uongozi wa Wilaya kwa kumlea na kumsaidia mwekezaji huyu lakini niwasihi sana tuzidi kumlea na serikali inawalinda wawekezaji wa ndani kama hawa kwa uwapa moyo hasa wawekezaji katika mafuta ya kula kwani kwasasa serikali inatumia zaidi ya shilingi bilioni 443 kwa kuagiza mafuta nje ya nchi fedha ambazo zingeokolewa na kutoa huduma kwa wananchi wengine,”alisema Mhe. Kairuki

Aidha Mhe. Kairuki alizidi kumpongeza Mwekezaji huyo kwa kuongeza ukubwa wa kiwanda chake tofauti ana awali na kujenga mitambo kwa ajili ya kukamua mashudu na kuwaomba halmashauri kumwongezea eneo lingine na kumsaidia kulipima ili apanue kiwanda chake hali itakayokuza kiwanda na kuongeza ajira kwa wananchi.

“Nawashauri kuchukua mkopo katika taasisi za fedha kwa ajili ya kununua mitambo mikubwa zaidi kwa ajili ya kusafisha mafuta mengi zaidi na kuachana na kwenda kwa wawekezaji wengine kusafisha mafuta kwa kuwa na mitambo yenu mtakua kibiashara na kuongeza uzalishaji,”alisisitiza Mhe. Kairuki

Hata hivyo amemuahidi mwekezaji huyo kuzifanyia kazi changamoto alizokumbana nazo wakati wa kuingiza nchini mtambo wa kukamua alizeti na kupelekea kulipa kiasi cha shilingi milioni 60 ambapo hadi sasa sehemu ya mtambo huo umekwama bandarini kutokana na kutolipiwa ikiwa uingizaji wa mtambo huo hautakiwi kulipiwa kiasi chochote cha fedha.

Kwa upande wake Mkuu wa Wilaya ya Kondoa Mhe. Sezaria Makota amemshukuru Mhe. Kairuki kwa kufanya ziara katika wilaya ya Kondoa na kumpongeza Bwana Muhammad Mavere kwa kuongeza uzalishaji kutoka kuzalisha tani 24 kwa siku alipoanza hadi kufikia tani 50 kwa siku na kumuahidi kutatua changamoto zinazomkabili zilizopo ndani ya uwezo wake na kuziwasilisha sehemu husika zilizo nje ya uwezo wake.

Naye Meneja wa Kituo cha Uwekezaji Tanzania Kanda ya kati Bwana Revocatus Rasheli amemsihi Bwana Mavere kuwasilisha changamoto zake katika kituo hicho Dodoma Mjini na kusema kuwa kwasasa serikali imeanzisha vituo vya uwekezaji ambapo mwekezaji atapata huduma zote za serikali katika kituo kimoja anapotaka kuwekeza na kwasasa kituo hicho kipo Dar Es Salaam na kipo mbioni kuanzishwa mkoani Dodoma lengo likiwa ni kuboresha huduma za uwekezaji nchini.