Waziri wa Ulinzi awaasa SUMA JKT

Tarehe iliyowekwa: October 23rd, 2018

Kampuni ya SUMA JKT inayomilikiwa jeshi la kujenga taifa imetakiwa kutimiza malengo ya serikali ya kujenga majengo yenye ubora na kumaliza kwa wakati ili kundelea kuaminiwa na serikali.

Hayo yalibainishwa na Waziri wa Ulinzi Mhe. Dkt. Hussen Mwinyi alipokuwa akiongea na viongozi wa wilaya ya Kondoa katika ofisi ya Mkuu wa wilaya baada ya kukagua mradi wa ujenzi wa jengo la Utawala la Halmashauri ya Mji kondoa linalojengwa na SUMA JKT.

Alisema kuwa serikali imewaamini SUMA JKT ambapo kwa sasa wana miradi mingi katika maeneo mengi hivyo ni jukumu la viongozi wa JKT kusimamia miradi hiyo kwa ukamilifu na kuhakikisha inakamilika kwa wakati ili huduma za msingi zianze kutolewa katika ofisi hizo.

“Najua mpo nyuma ya muda wa kazi ila naamini mtafidia kama mlivyoahidi na nashauri mvua zipo karibu mjitahidi kupeleka eneo la kazi vifaa vyote muhimu vitakavyotumika hapo mbeleni ili kuepusha kusimama kwa kazi tena.”Alisisitiza Dkt. Mwinyi

Kwa upande wake Mkuu wa Wilaya ya Kondoa Mh. Sezaria Makota alieleza kuwa hana mashaka na kazi inayoendelea kwani anajua SUMA JKT  kazi zao ni za uhakika na viwango na anaridhika na kasi wanayokwenda nayo japokuwa hapo awali walikumbana na changamoto ya barabara ya kwenda kwenye mradi ambapo kwasasa imekwishatatuliwa.

Ziara ya ukaguzi wa miradi inayotekelezwa na SUMA JKT inafanywa na Dkt. Mwinyi kwa lengo la kuangalia shuhuli zinazofanywa, changamoto zinazoikabili miradi na kukaa na pande mbili kuona namna ya kuzitatua ambapo katika wilaya ya Kondoa wanajenga jengo la utawala la halmashauri ya Mji ambalo linagharimu zaidi ya shilingi bilioni 2 ambapo aliongozana pia na Mkuu wa JKT  Meja Jenerali Martini Busungu na Mkurugenzi Mtendaji wa SUMA JKT Kanali Rajabu Mabele.